Elbasy N. Nazarbaev meniń armanymdy oryndady. Bul týraly júzýden Rio Olimpiadasynyń altyn júldegeri Dmitrii Balandin HHHI jazǵy Olimpiada jeńimpazdary men júldergerlerine qatysýymen ótip jatqan qurmet kórsetý sharasynda málimdedi, dep habarlaidy Baq.kz tilshisi.
«Qurmetti, Elbasy barsha Qazaqstan halqyn osy jeńispen quttyqtaýǵa ruqsat etińiz. Bul sizdiń jeńisiz ben eńbegińiz. Siz sportshylardyń osyndai biikterdi baǵyndyrý úshin barlyq jaǵdai jasap otyrsyz. Men shyn júregimmen sizge alǵysymdy bildiremin. Sebebi, siz meniń armanymdy oryndadyńyz. Olipm tuǵyryna kóterilip, qazaq eliniń ánuranyn tyńdadym. Siz osy úshin úlken alǵysymdy bildiremin», - dedi júzýden Rio Olimpiadanyń jeńimpazy.
Aita keteiik, sportshylardyń búgingi kún tártibi "Báiterek" monýmenti aldyndaǵy merekelik sharadan bastaldy. Sol jerde olar kabrioletke minip, Astana kóshelerimen júrip ótti.
Braziliianyń Rio-de-Janeiro qalasynda ótken Olimpiada oiyndarynda Qazaqstan sportshylary úsh altyn, bes kúmis, toǵyz qola medal jeńip alǵan bolatyn. Jalpykomandalyq esepte ulttyq quramamyz 22-shi oryndy ielenip, medal sany jaǵynan rekord ornatty. Buǵan deiin Atlantada - 11, Sidneide - 7, Afinyda - 8, Pekinde - 13, al London Olimpiadasynda 13 medal enshilegen bolatynbyz. Bul joly qorjynǵa 17 júlde tústi.
Rio-Olimpiadasynda sportshylarymyz Nijat Rahymov, Daniiar Eleýsinov jáne Dmitrii Balandin altyn alsa, Jazira Japparqul, Eldos Smetov, Vasilii Levit, Ádilbek Niiazymbetov pen Giýzel Maniýrova kúmis medalǵa qol jetkizdi. Qola júlde alǵandardyń qatarynda Galbadrah Otgontsetseg, Farhad Harki, Karina Goricheva, Aleksandr Zaichikov, Olga Rypakova, Elmira Syzdyqova, Ekaterina Larionova, Ivan Dychko, Dariǵa Shákimova bar.
Osy jylǵy Olimpiada oiyndaryna 28 sport túrinen 206 memleket pen bosqyndar komandalarynan 10 myńnan astam sportshy qatysty. Bairaqty básekede 306 medal jiyntyǵy sarapqa salyndy. Tórtjyldyqtyń basty dodasynda elimizdiń namysyn 26 sport túrinen 104 sportshy qorǵady.
