Qytaidyń «Singer 2017» ánshiler básekesiniń aqtyq synynda Dimash Qudaibergen Shań Venjemen (尚雯婕) birge án shyrqaidy, dep habarlaidy QazAqparat tilshisi.
Buǵan deiin habarlaǵanymyzdai, Dimash baiqaýdyń jartylai finalynda italiialyq ánshi Adriano Chelentanonyń «Confessa» ánin jáne «5-elementtegi» ariiany qosa shyrqap, aqtyq básekege súrinbei jetti.
Qytailyq Sina weibo áleýmettik jelisindegi aqparatqa sensek, baiqaýdyń aqtyq básekesine joldama alǵan 8 ánshi qytai estradasynyń juldyzdarymen jup bolyp óner kórsetedi.
Aita keteiik, Shań Venje 1982 jyly Shanhai qalasynda týǵan. Shanhai Fýdan ýniversitetin bitirgennen keiin ánshilik jolyn bastaǵan. Frantsýz jáne aǵylshyn tilderin jetik meńgergen. 2006 jyly Hýnan telearnasynyń «Super Girl» án baiqaýynda bas júldeni jeńip alǵan, sondai-aq, 2013 jyly «I am singer» baiqaýynyń alǵashqy maýsymynda óner kórsetken. 2012 jyly Parij qalasynda frantsýz ánderi mýzykalyq keshin ótkizgen. Dimash Qudaibergen kelisimshartqa otyrǵan BGTalent (黑金经纪) prodiýserlik kompaniiasynyń negizin qalaýshy.
Eske sala keteiik, «Singer» baiqaýynyń jartylai finaly Hýnan telearnasynan 8 sáýir kúni kórsetiledi. Baiqaýdyń finalyn 15 sáýir kúni otandyq Habar arnasynan jáne Hýnan telearnasynan tikelei efirden tamashalaýǵa bolady.
