Foto: QR MAM
Astanada TÚRKSOI halyqaralyq uiymynyń marapattaryn tabystaý rásimi ótti. Qazaqstannyń halyq ártisi Dimash Qudaibergen túrki álemi mádenietin damytýǵa qosqan eleýli úlesi úshin TÚRKSOI uiymynyń eń joǵary nagradasy sanalatyn «Túrki áleminiń mádeni elshisi» ataýly ordenimen marapattaldy, dep habarlaidy Ult.kz.
Sondai-aq Qazaqstannyń eńbek sińirgen qairatkeri, aktrisa Samal Esliamovaǵa túrki jáne álemdik kino óneriniń damýyna qosqan airyqsha úlesi úshin «Túrki áleminiń úzdik ártisi» nominatsiiasy boiynsha TÚRKSOI-dyń arnaiy júldesi tabystaldy.
QR Premer-Ministriniń orynbasary – Mádeniet jáne aqparat ministri Aida Balaevanyń atynan óner ielerin QR Mádeniet jáne aqparat vitse-ministri Aibek Sydyqov quttyqtap, olardyń jetistikteri túrki álemi elderi arasyndaǵy mádeni bailanystardy nyǵaitýǵa jáne qazaqstandyq ónerdiń halyqaralyq deńgeide tanylýyna zor úles qosyp otyrǵanyn atap ótti.
TÚRKSOI uiymynyń Bas hatshysy Sultan Raev marapattardyń mańyzyna toqtalyp, qazaqstandyq mádeniet qairatkerleriniń ortaq túrki mádeni keńistigin nyǵaitýdaǵy róli týraly aitty.
«Búgin biz óner arqyly túrki álemin shynaiy biriktirip júrgen tulǵalardy qurmettep otyrmyz. Dimash Qudaibergen mýzyka arqyly mádeni elshi missiiasyn atqaryp keledi. Al, Samal Esliamova qazaqstandyq kino óneriniń simvolyna ainaldy. Bul marapattar – olardyń eńbegine berilgen laiyqty qurmet», – dedi TÚRKSOI Bas hatshysy.
Óz kezeginde Dimash Qudaibergen marapatty qabyldai otyryp, óner adamy úshin eń úlken marapat – halyqtyń qoldaýy ekenin atap ótti.
«Óner adamy úshin eń joǵary marapat – halyqtyń moiyndaýy men qoldaýy. Bul marapatty men elderimiz arasyndaǵy diplomatiialyq qarym-qatynastardyń nyǵaiýyn bildiretin mańyzdy belgi retinde qabyldaimyn. Bul marapat jeke ózime emes, búkil qazaq halqyna kórsetilgen qurmet pen iltipat dep bilemin», – dedi óner iesi.
Aita keteiik, Dimash bul marapatqa ie bolǵan ekinshi tulǵa. Buǵan deiin mundai ataq Túrkiianyń Nobel syilyǵynyń laýreaty, professor Aziz Sandjarǵa berilgen bolatyn.
