Elbasy joly Otanymyzdyń jarqyn bolashaqqa aparatynyna senemin. Mundai pikirdi Nursultan Nazarbaevtyń Prezidenttik ókilettigin toqtatýyna orai ánshi Dimash Qudaibergen bildirdi, dep habarlaidy QazAqparat tilshisi.
«Nursultan Ábishuly Nazarbaev - óte keremet adam. Óitkeni ol elimizdi jańartyp, kórkeitti. Qazaqstan Respýblikasyn álemge tanytty. Elbasymyzdyń jyl saiynǵy halyqqa arnalǵan ár Joldaýy bizge kúsh-qýat berýmen qatar, halyqtyń ál-aýqatyn, ekonomikamyzdyń nyǵaiýyn, azamattarǵa memlekettik qyzmet kórsetý sapasynyń artýyn, kompiýterlik saýattylyǵyn kóterilýin, jastardyń bilimge degen qushtarlyǵynyń keńeiýin kózdeidi», - dedi ol.
Osy oraida Dimash Tuńǵysh Prezidenttiń «Rýhani jańǵyrý: Bolashaqqa baǵdar», «Uly dalanyń jeti qyry» halyqqa naqty baǵdar berip, qazaqstandyqtardy úlken tabystarǵa jetýge itermeleitin baǵdarlamalar ekendigin basa aitty.
«Bul baǵdarlamalar meniń úlken maqsattarǵa jetýime, mádeniet, bilim kókjiegimdi keńeitýge molynan jol ashty dep aita alamyn. Sonyń aiǵaǵy - álemge týǵan elim, keń baitaq jerimdi ónerim arqyly pash etip, qazaqtyń mártebesin kóterýge umtylysym. Bizge, jastarǵa osyndai keremet múmkindikter týǵyzǵan, Táýelsiz memleketimizdiń jetistikteriniń basy-qasynda bolǵan Elbasymyzǵa shyn nietimmen, zor alǵysymdy bildirgim keledi. Siz bastap, kórsetip bergen jol - Otanymyzdyń jarqyn bolashaǵyna aparatyn jol ekenine kámil senemin!», - dedi Dimash Qudaibergen.
