Biyl UBT-dan keiin barlyq aýditoriialardan jazylǵan videolar tekseriledi. Bul týraly Ulttyq testileý ortalyǵynyń direktory Didar Smaǵulov málim etti, dep habarlaidy QazAqparat.
«Biyl Ulttyq biryńǵai testileýdi ótkizýdiń jańashyldyqtaryna toqtalsaq, baqylaý sharalary kúsheitildi. Eger ǵimaratqa kirgizý barysynda tyiym salynǵan zattar, iaǵni smartfondar, jazba qaǵazdary jáne basqa da quraldar tabylsa, onda testilenýshi emtihanǵa jiberilmeidi. Kez kelgen adam UBT-nyń ótýi barysyn kóre alady. Kórsetilim siltemesi UBT jaqyndaǵanda jariialanady», - dedi D. Smaǵulov Ortalyq komýnikatsiialar qyzmetinde.
Onyń sózine qaraǵanda, ár aýditoriiada beinebaqylaý ornatylady.
«Barlyq beinejazbalarǵa 25 tamyzǵa deiin taldaý júrgiziledi. UBT ótkizý qaǵidalarynyń buzylýy anyqtalǵan jaǵdaida, iaǵni kóshirý nemese basqa da áreketter baiqalsa, testileý nátijeleri joiylady. Sonymen qatar, bilim berý grantyn taǵaiyndaý konkýrsynyń nátijeleri de joiylýy múmkin», - dep túsindirdi ortalyq basshysy.
Onyń aitýynsha, UBT ótkizý barysynda baqylaýdy qamtamasyz etetin ókildermen úshjaqty kelisimder jasalady. Baqylaý tek testilenýshilerge ǵana emes, sondai-aq baqylaýshylarǵa da júrgiziledi.
«Ár adam UBT ótý barysyn baqylai alady jáne ereje buzý anyqtalsa, dereý Ulttyq testileý ortalyǵyna habarlasýǵa bolady», - dedi Didar Smaǵulov.
