Parlament Májilisiniń jalpy otyrysynda depýtat Erlan Smailov ziiandy jáne qaýipti eńbek jaǵdailarynda jumys isteitin qyzmetkerler úshin zeinet jasyn tómendetýdi usyndy. Osy oraida QR Premer-Ministriniń orynbasary Eraly Toǵjanovtyń atyna sýal joldady, dep habarlaidy "Ult aqparat".
«Qaýipti jáne ziiandy eńbek jaǵdailarynda jumys isteý qyzmetkerlerdiń densaýlyǵyna teris áser etedi. Statistikaǵa sáikes, 2020 jyly elimizde ómir súrýdiń ortasha kútiletin uzaqtyǵy er adamdarda 67, áielderde 75,5 jasty qurady. Shyn máninde, ziiandy óndiristermen ainalysatyn er adamdar úshin bul tolyqqandy laiyqty qarttyqqa óz quqyǵyn iske asyrý múmkindiginiń joqtyǵyn bildiredi. 1956 jyly KSRO-nyń «Zeinetaqymen qamsyzdandyrý týraly» Zańy 9-bapta jerasty jumystarynda, ziiandy eńbek jaǵdailary bar jumystarda jáne ystyq tsehtarda jumysshylar men qyzmetkerler úshin qarttyq boiynsha zeinetkerlikke jeńildikpen shyǵý quqyǵyn belgiledi: erler – 50 jasqa tolǵanda jáne jumys ótili keminde 20 jyl bolǵanda, áielder – 45 jasqa tolǵanda jáne jumys ótili keminde 15 jyl bolǵanda. El joiqyn soǵystan endi-endi qalpyna kelse de, jumysshylardyń quqyqtary men múddelerin qatań saqtady», - dedi E. Smailov.
Onyń aitýynsha, osy saladaǵy memlekettik saiasatynyń qisyny bizdiń azamattardyń múddesimen emes, biýdjet shyǵyndaryn qysqartý qajettiligimen aiqyndalady.
«Sonymen qatar makroekonomikalyq, áleýmettik, demografiialyq faktorlardy taldaý men esepke alýǵa negizdelgen keshendi tásil ziiandy jáne qaýipti óndiristerde jumys isteitin qyzmetkerlerdiń zeinetke erterek shyǵýynyń utymdy ári tutastai alǵanda áleýmettik-ekonomikalyq sala úshin birqatar paidasy bar ekenin dáleldeidi. Máselen, álemde júrgizilip jatqan áleýmettik-demografiialyq zertteýler zeinetke shyǵý jasynyń artýy eresek turǵyndardyń múgedektiginiń aitarlyqtai ósýine alyp keletinin kórsetýde. Olardy meditsinalyq jáne áleýmettik qamtamasyz etýge arnalǵan memlekettik biýdjettiń tiisti shyǵyndary da ósedi», - dedi depýtat.
Onyń paiymynsha, óndiristegi egde jastaǵy jumysshylar osyǵan bailanysty «ońai jumysqa» aýysýǵa tyrysady. Biraq mundai jumys oryndarynyń sany shamaly jáne ony ońai dep ataýǵa taǵy kelmeidi.
«Sheshim bar. Ol ziiandy jáne qaýipti eńbek jaǵdailarynda jumys isteitin qyzmetkerler úshin zeinet jasyn tómendetý», - dedi depýtat.
