Májilis depýtaty Ekaterina Smyshliaeva balalarǵa JSN-di (IIN) dúniege kelgen boida berýdi usyndy, dep habarlaidy Sputnik Qazaqstan.
Depýtat sońǵy ýaqytta sábilerdi qoqysqa tastaý, maýgli balalar men basqa da qaiǵyly oqiǵalar týraly jaǵymsyz jańalyqtar jiilep ketkenine alańdady.
"Kúni keshe náreste saýdasy boiynsha tutas bir internet portaldyń qyzmeti áshkerelendi. Quqyqtyq memlekette buǵan qalai jol berildi? Bul jerde neke jáne otbasy, buqaralyq aqparat quraldary týraly zańdardyń buzylǵany sózsiz. Adam satý faktisi bolǵan. Barlyq zańǵa qaishy áreket boiynsha tiisti tekseris júrgizilip jatyr", - dedi Smyshliaeva Úkimet basshysyna joldaǵan depýtattyq saýalynda.
Ol osy tizbekten sebep-saldar bailanysty qadaǵalaý óte qiyn ekenin atap ótti. Sebebi bala ómirge kelgenimen, zań boiynsha eshbir jerde tirkelmegen. Depýtattyń aitýynsha, mundai olqylyq tirkeý protsedýrasynan ketip otyr.
"JSN nárestege týǵan kezde emes, ata-anasy oǵan at qoiyp, tirkeý týraly ótinishpen júgingende ǵana beriledi. Bul rette protsedýranyń ózi úsh aqparattyq júieden ótedi – meditsinalyq registr (jynysy, týǵan kúni men anasynyń aty-jóni tirkeledi), ádilet ministrliginiń bazasy (ZAGS) jáne ishki ister ministrliginiń aqparat júiesi. Dál osy sońǵysy jańa týǵan náresteniń JSN-in qalyptastyrady. Alaida sábi aty-jóni tirkelgenge deiin ailar boiy "tsifrlyq izsiz" júrýi múmkin. Tipti tirkeý aktileri múlde bolmaǵan mysaldar da bar", - dedi depýtat.
Smyshliaevanyń aitýynsha, zań boiynsha birden rásimdelmegen balalar adam saýdasy men túrli qylmystyq shemalarǵa jii tartylady.
"Esepke alýdyń tsifrlyq quraldary qolda bola tura, sábidi dúniege kelgen sátte aqparattyq júielerde birden tirkemeý jáne memleket qamqorlyǵyna almaý – bul da qylmystyq salǵyrttyq. Osyǵan bailanysty balaǵa JSN-di ol týǵan sátte berý qajet dep sanaimyz", - dedi Májilis depýtaty.
