Parlament Májilisiniń jalpy otyrysynda depýtat Aijan Sqaqova bala kútimi boiynsha járdemaqy mólsherin arttyrýdy surady, dep habarlaidy "Ult aqparat".
«Ana men bala, olardyń densaýlyǵy men ál-aýqaty bir-birimen tyǵyz bailanysty. Sonymen, birinshi faktor – bala kútimi boiynsha járdemaqy múldem jetkiliksiz! Jumys istemeitin áielder úshin bala kútimi boiynsha ai saiynǵy járdemaqy: birinshi balaǵa 16 802 teńgeni, ekinshi balaǵa – 19 865 teńgeni, úshinshi balaǵa – 22 898 teńgeni, tórtinshi jáne odan artyq balaǵa – 25 961 teńgeni quraidy. Bul bir balaǵa kúnine 560 teńgeden 865 teńgege deiin jumsalady degen sóz. Al qamaýdaǵy bir adamnyń tamaǵyna 1 018 teńge qarastyrylǵan. Balanyń anasyna járdemaqyda aqsha qarastyrylmaǵan!», - dedi depýtat Úkimet basshysynyń orynbasary Eraly Toǵjanovtyń atyna joldaǵan saýalynda.
Onyń paiymynsha, járdemaqylarǵa qatysty rásimderdiń kóptigi, olardy ákimshilendirýdiń kúrdeliligi sybailas jemqorlyq shemalaryn týdyrady. Sondai-aq azamattardy zańsyz áreketterge itermeleidi. Mysaly, AÁK jaǵdaiynda adamdar otbasynyń tabysyn azaitý maqsatynda ata-analardyń jalǵan ajyrasýy siiaqty jáne t.b. járdemaqy alýdyń shemalaryna júginedi.
Budan bólek A. Sqaqova osal toptaǵy qazaqstandyqtar úshin turǵyn úidiń qoljetimsizdigi máselesine toqtaldy.
«Qolda bar memlekettik baǵdarlamalardyń jetkiliksiz ekenin túsiný kerek. Óitkeni olar barlyq qazaqstandyqtarǵa jaramaidy. Olar eń bolmaǵanda ortasha tabysy bar adamdarǵa arnalǵan», - dedi depýtat.
