Densaýlyq saqtaý ministrligi eldegi aýrýhanalardy onlain formatta qadaǵalaý tártibin engizdi, dep habarlaidy QazAqparat.
«Dári-dármektiń qymbatqa satylý máselesine bei-jai qaramai, áleýmettik jelide tirkelgen faktilerdi bólisip jatqan azamattar bar. Olar dárini alyp satatyn adamdardyń áreketine narazylyqtaryn bildirýde. Qoǵamǵa mundai zańsyz saýdamen kúres qatal júrgiziletini jetti degen oidamyn. Halyqtyń densaýlyǵynan osylai paida taýyp jatqan adamdar jazalanady», - dedi Densaýlyq saqtaý ministri Aleksei Tsoi OKQ-da ótken baspasóz máslihatynda.
Ministr sonymen birge meditsinalyq uiymdardy qadaǵalaýdyń jańa formaty - onlain-baqylaý tártibi engizilgenin jetkizdi.
«Keshe ǵana Atyraýdaǵy aýrýhanalardy onlain-baqylaý júrgizildi. Bul degenimiz qazir Densaýlyq saqtaý ministrliginiń qyzmetkerleri kez kelgen óńirdiń meditsinalyq uiymyna habarlasyp, onlain bailanyspen uiymdy baqylaidy. Qyzmetkerlerimiz shynaiy máseleni suraidy. Qandai kabinetke kirýdi de ministrlik qyzmetkerleri aityp otyrady. Keshe ǵana osyndai tártippen birneshe patsientpen sóilestik. Iaǵni jumystyń osyndai formaty az ýaqyttyń ishinde birneshe aýrýhana jumysyn tekserýge múmkindik berdi», - dedi Aleksei Tsoi.
