Densaýlyq saqtaý ministri Aleksei Tsoi Atyraý oblysyndaǵy infektsiialyq statsionardyń jumysymen onlain-rejimde tanysty, dep habarlaidy "Ult aqparat".
Densaýlyq saqtaý ministrligi baspasóz qyzmetiniń málimetinshe, ministr Aleksei Tsoi Atyraý oblysyndaǵy qazirgi epidemiologiialyq jaǵdaidy baǵalaý úshin №2 oblystyq aýrýhana men oblystyq jedel meditsinalyq járdem stantsiiasyn onlain-rejimde aralaǵan.
Ministr qabyldaý, reanimatsiia jáne infektsiialyq bólimshelerdiń, sondai-aq 103 dispetcherlik qyzmeti men mobildi ámbebap brigadanyń jumysymen tanysty.
Qazir №2 oblystyq aýrýhanada COVID-19 koronavirýs infektsiiasyna shaldyqqan patsientterge arnalǵan 180 tósek bar. Onda 162 naýqas em alýda, tósek-orynnyń 90% bos emes. Aýrýhanadaǵy 100 oryn ottekti konsolmen qamtamasyz etilgen. Sondai-aq, munda ókpeni jasandy jeldetetin 12 apparat bar.
Oblystyq densaýlyq saqtaý basqarmasynyń basshysy Nurlybek Qabdyqaparov qosymsha 90 tósektik infektsiialyq statsionar salý josparlanyp otyrǵanyn aitty. Demeýshiler ókpeni jasandy jeldetýge arnalǵan taǵy 30 jáne 100 oksigenatsiia apparatyn satyp alyp bermek. Budan basqa, Qurmanǵazy aýdanyna kompiýterlik tomografiia apparaty alynady.
«Ortalyqtandyrylǵan ottegi júiesi joq jerlerge ottegi kontsentratoryn ornatý kerek. Eger ottegisiz jumys isteitin kontsentrattar bolsa, ony satyp alý qajet. Mundai apparattardy birinshi kezekte muqtaj statsionarlarǵa jiberińizder», - dedi ministr.
Al, kezek oblystyq jedel meditsinalyq járdem stantsiiasyna kelgende ministr Aleksei Tsoi 103 dispetcherlik qyzmetimen, jedel járdem qońyraýyn qabyldaý, patsientterdiń jaǵdaiynyń aýyrlyǵyna bailanysty qońyraýlardy suryptaý jumysymen tanysty. Búginde 42 jedel járdem brigadasy meditsinalyq kómek kórsetedi. Stantsiiada táýligine shamamen 1 100-1 200 shaqyrý qabyldanady. Júkteme eki esege artqan.
Ministr mobildi ámbebap brigadanyń jumysyn kúsheitýdi, ambýlatoriialyq dári-dármekpen qamtamasyz etý aiasynda dárilik zattardy ýaqytyly jetkizýdi, sonymen qatar, infektsiialyq statsionarlardan shyqqan naýqastardyń ambýlatoriialyq emine erekshe nazar aýdarýdy tapsyrdy.
Mobildi brigada bir táýlikte 35 qońyraýǵa qyzmet kórsetedi. Mamandar respiratorlyq aýrý boiynsha shaqyrǵandardan PTR-test kómegimen COVID-19 infektsiiasyna analiz alady. Patsientti qarap, satýratsiiasyn ólsheidi.
Aleksei Tsoi onlain túrde nysandardy aralap bolǵan soń, oblystyq densaýlyq saqtaý basqarmasynyń basshysymen óńirdegi epidemiologiialyq jaǵdaiǵa qatysty birqatar máselelerdi talqylady. Atap aitqanda, ken oryndarynda indettiń órshýiniń aldyn alý, jaǵdaiy aýyr patsientterdi shuǵyl emdeýdiń ádisin ázirleý, meditsina mamandarynyń difitsit máselesin sheshý syndy problemalar sóz boldy.
Densaýlyq saqtaý ministri koronataksi jumysyna, epidemiologiialyq jaǵdailarda TMKKK men MÁMS paketterin qarjylandyrýdy qaita qaraý máselesine basa nazar aýdardy.
«Koronataksige basa nazar aýdarý kerek. Bul iske ishi taza kez-kelgen taksi aralasa alady. Eger emhanada kólik jetpei jatsa, bul jergilikti ákimdik kómektespeidi degen sóz», - dedi ministr.
Sondai-aq, ministr infektsiialyq statsionardaǵy patsienttermen virtýaldy túrde kezdesip, olardyń tez saýyǵyp ketýin tiledi.
