Sandyq tehnologiia koronavirýs pandemiiasymen kúresýde jetekshi ról atqara alady. Bul týraly Dúniejúzilik densaýlyq saqtaý uiymynyń Eýropalyq óńirlik biýrosynyń direktory Hans Kliýge beisenbi kúngi onlain-brifing kezinde málimdedi, dep habarlaidy QazAqparat.
«Sandyq tehnologiia pandemiiamen kúreste jetekshi ról atqara alady. Ol naýqastanǵan adamdardyń kimmen bailanysta bolǵanyn anyqtaidy. Eýropada sandyq baqylaý týraly ulttyq sheshim qabyldaǵan 27 eldiń quramynda Avstriia, Grýziia jáne Soltústik Makedoniia bar. Taǵy 4 el (Andorra, Finliandiia, Irlandiia, Portýgaliia) jobany daiyndap jatyr», dedi Kliýge.
«Sandyq tehnologiia men jasandy intellekt pandemiia kezinde óziniń tiimdiligin dáleldep úlgerdi. Frantsiiada telefondaǵy virtýaldy kómekshi jasandy intellektiń kómegimen bir ýaqytta myńnan asa adamǵa jaýap bere alady», - dep tolyqtyrdy ol.
«Italiia jasandy intellektige negizdelgen tehnologiiany synaqtan ótkizip jatyr. Ol smartfondaǵy baǵdarlama men kamera arqyly júrek jiyrylýynyń jiiligi, júrek yrǵaǵynyń ártúrliligi, ottegimen qanyǵý jáne tynys alýdyń jiiligi týraly mańyzdy málimetterdi jinaidy. Shvetsiiada telemeditsina dástúrli kómekti qoldaý úshin paidalanylady», - dedi Hans Kliýge.
Koronavirýspen kúresýde sandyq tehnologiiany utymdy paidalanýǵa shaqyrǵan DDSU Eýropa óńirlik biýrosynyń basshysy adamdardyń jeke málimetteriniń de qorǵalýyna basa nazar aýdarý kerektigin atap ótti.
