Koronavirýsty juqtyrý jaǵdailary azaiyp otyrǵan elder baqylaýdy álsiretetin bolsa, indettiń ekinshi tolqynyna tap bolýy múmkin. Bul týraly dúisenbi kúni onlain-brifing barysynda Dúniejúzilik densaýlyq saqtaý uiymynyń densaýlyq saqtaý salasyndaǵy tótenshe jaǵdai jónindegi baǵdarlamanyń jetekshisi Maikl Raian aitty, dep habarlaidy "Ult aqparat".
Onyń aitýynsha, qazir álem koronavirýs pandemiiasynyń alǵashqy tolqynynyń bel ortasyna jetti. Sebebi Ortalyq jáne Ońtústik Amerikada, Ońtústik Aziiada jáne Afrikada indetke shaldyǵý qarqynmen jalǵasýda.
Aýrýdyń taralýy tolqyn tárizdes bolady: ósimnen soń tómendeý baiqalyp, keiin juqtyrý qaita bastalady. DDU ókili atap ótkendei, mamandar «ekinshi tolqyn» uǵymyn kelesidei túsindirýde: birinshi tolqynda syrqattanǵandar sany barynsha tómen deńgeige deiin azaiady, al birneshe aidan soń aýrý qaita órshidi.
«Jáne bul birneshe aidan keiin kóptegen memleketterde kórinis tabýy múmkin», - dedi ol.
Bul rette, pandemiianyń ekinshi kezeńi maýsymdyq tumaýmen tuspa-tus kelýi yqtimal. Onymen qosa, M.Raian adamzat pandemiianyń birinshi kezeńinde ony qaita órshitip alýy múmkindigin eskertti. Mundai jaǵdai 1918-1920 jyldary ispan gripiniń pandemiiasy kezinde bolǵan. Osyǵan orai, álem elderi densaýlyq saqtaý salasyndaǵy keshendi sharalardy jalǵastyrýy tiis, koronavirýsqa testileýdi toqtatpai, onyń taralý joldaryn zertteýi qajet.
Sondai-aq infektsiianyń ekinshi tolqynyn boldyrmas úshin áleýmettik sharalardy kúshinde qaldyrǵan jón.
