Basqa elge ushý úshin koronavirýs testin tapsyryp jatqan jolaýshylar. Ońtústik Afrika, 26 qarasha 2021 jyl.
Juma kúni tótenshe jiyn ótkizgen Dúniejúzilik densaýlyq saqtaý uiymy (DDSU) Ońtústik Afrikada tarap jatqan koronavirýstyń jańa variantyn "alańdatatyn" virýs retinde atady, dep habarlaidy Azattyq.
"Bul varianttyń mýtatsiialary kóp, bir bóligi alańdaýshylyq týǵyzady. Aldyn ala málimetterge qaraǵanda, bul variantpen bailanysty [virýs] aýrýdyń qaita juǵý qaýpin arttyrady" dedi DDSU ókilderi.
Uiym ókilderiniń aitýynsha, jańa variant koronavirýstyń buǵan deiingi shtamdaryna qaraǵanda óte jyldam taralady. Buǵan deiin B.1.1.529 dep atalyp kelgen shtamdy DDSU grektiń "omikron" árpimen atady. Sarapshylar bul varianttyń Ońtústik Afrikanyń barlyq provintsiialarynda taralýy múmkin ekenin aitty.
Boljam boiynsha, "omikronnyń" kóptegen mýtatsiialary koronavirýsqa qarsy immýnitetke tótep bere alady, qazirgi vaktsinalardy tiimsiz etip, tez taralady.
Álem úkimetteri Ońtústik Afrikadan keletin ushaqtarǵa jappai tyiym sala bastady. Sońǵy aqparatqa qaraǵanda, ondaǵan memleket jáne Eýroodaq elderi 26 qarashada Ońtústik Afrikadan keletin ushaqtardy qysqarta bastaǵan.
Bul variant negizinen Ońtústik Afrikanyń soltústigindegi Haýteng provintsiiasynda taraǵan. Bul aimaqqa Iohannesbýrg pen OAR astanasy Pretoriia da kiredi. Qazir jańa variant Botsvana men Gonkongte, Izrail men Belgiiadan anyqtalǵan.
Ázirge Qazaqstan biligi "omikronǵa" bailanysty habarlama taratpady. Kórshi Resei 28 qarashadan bastap Ońtústik Afrikanyń toǵyz memleketi jáne Gonkongten keletin ushaqtarǵa shekteý qoia bastaidy.
