Koronavirýstyń ótken aida Afrikanyń ońtústiginen shyqqan "omikron" shtamy qazirgi "delta" shtamǵa qaraǵanda tezirek juǵady, qoldanystaǵy vaktsinalardyń oǵan áseri shamaly. Alaida qazirgi málimetterge qaraǵanda, "omikron" jeńilirek ótedi. Dúniejúzilik densaýlyq saqtaý uiymy jeksenbide taratqan bul aqparatyna France Presse agenttigi silteme jasaǵan.
Bul qujatqa qaraǵanda, "omikron" jyldam taralyp jatqan elderde "delta" yǵysyp qalýy múmkin.
Qazirgi ýaqytta "omikron" 63 elden tabylǵan. Ońtústik Afrika respýblikasynda "omikronmen" aýyrǵandar birer aptada birneshe ese kóbeigen. Aýyrǵandardyń kóbinen salqyn tigenge uqsaityn jeńil sipmtomdar baiqalǵan. Ázirge "omikronnan óldi" deitin jaǵdai bolmaǵan.
Solai bolsa da jeksenbi kúni Britaniia epidemiia qaýipsizdigin kúsheitti. Bul elde myńnan astam adamnan "omikron" tabylyp, keibiri aýrýhanaǵa túsken. Ólgender joq. Ulybritaniianyń premer-ministri Boris Djonson koronavirýs vaktsinasyn úshinshi ret saldyrýǵa shaqyrdy.
Izrail Britaniia, Daniia, Belgiiany "qara tizimge" engizip, bul elderden adam kirgizbeýge bekindi.
Mamandar jańa shtamnyń salystyrmaly túrde jeńil ótetini jáne vaktsinanyń áskeri jaily naqty qorytyndy shyǵarýǵa erte dep sanaidy. Ońtústik Afrika respýblikasy men Izrailde júrgizilgen shaǵyn zertteýler Pfizer vaktsinasynyń eki dozasynyń "omikronǵa"áseri aitarlyqtai azaiǵanyn kórsetken. Biraq úshinshi dozasynyń áseri joǵary bolyp shyqqan. Ázirge Reseidiń "Spýtnik V" vaktsinasynyń áseri týraly málimet joq.
