Dástúrli «Mýzei túni» aktsiiasy COVID-19 koronavirýs pandemiiasyna bailanysty tuńǵysh ret «Biz birgemiz» ataýymen onlain formatta uiymdastyrylmaq. Qazaqstandyq mýzeiler Halyqaralyq mýzeiler kúni merekesine orai onlain-aktsiiany búgin ótkizbek, dep habarlaidy "Ult aqparat".
Elimizde 2006 jyldan beri júzege asyrylyp kele jatqan halyqaralyq iri áleýmettik mádeni-bilim berýge baǵyttalǵan «Mýzei túni» jobasyn tuńǵysh ret Qazaqstannyń Ortalyq memlekettik mýzeii uiymdastyryp, 15 jyl ishinde mýzeige kelýshiler nazaryna XVIII - XIX ǵǵ. tiesili biryńǵai jáne kóne jádigerlerdiń toptamasyn usynyp, 50-den astam kórme ótkizgen. Búginde atalǵan joba elimizdiń barlyq mýzeilerinde iske asyrylyp otyr.
QR Mádeniet jáne sport ministrliginiń málimetinshe, biylǵy is-shara aiasynda Qazaqstan Respýblikasynyń Ortalyq memlekettik mýzeii «Mýzei túni - 2020: Erekshe oqiǵalar hronikasy (2006-2020)» atty onlain saiahat jobasyn usynady. Sonymen qatar, biyl «Mýzei túni» aktsiiasyna alǵash ret qosylǵan «Mádenietterdi jaqyndastyrý ortalyǵy» memlekettik mýzeii Uly Jibek jolyna arnalǵan «Uly Jibek jolyndaǵy mádeniet jáne din» ekspozitsiialyq zalynyń tanystyrylymyn jasaidy.
«Bozoq» memlekettik tarihi-mádeni mýzei-qoryǵy «Zaman. Ǵalym. Kózqaras» tsikly aiasynda Qazaqstannyń belgili ǵalym-arheology, tarih ǵylymdarynyń doktory, professor Z.S. Samashevpen suhbat júrgizedi.
Ulttyq mýzei «Biz birgemiz» ataýymen kórermenderge «Uly Dala jaýharlary» atty beine-interviý, «Ulttyq mýzei – ult ainasy» derekti filmin, Qazaqstannyń respýblikalyq mýzeileriniń qyzmeti jóninde beinerolik, sonymen qatar birqatar zaldar boiynsha virtýaldyq týrlar uiymdastyrady.
Á. Qasteev atyndaǵy Qazaqstan Respýblikasynyń Memlekettik óner mýzeii kelýshilerge tanymdyq, interaktivti jáne oiyn-saýyq is-sharalar usynýdy kózdep otyr.
