Foto: Pexels.com
Áielder dárethanasynda qyzdardy videoǵa túsirgen Nazarbaev Ýniversitetiniń stýdenti jazaǵa tartyldy, dep habarlaidy Ult.kz.
Astana qalasynyń politsiia departamentiniń baspasóz qyzmeti quqyq qorǵaý organdary zań buzýshyny anyqtap, ony zań aiasynda jaýapkershilikke tartqanyn habarlady.
"Áleýmettik jelilerdi monitoringteý barysynda áielder dárethanasynda zańsyz beinejazba jasaý faktisi anyqtaldy. Zań buzýshylyqty 2-kýrs stýdentiniń jasaǵany belgili boldy. Surastyrý kezinde onyń bólimder arasyndaǵy sańylaý arqyly kórshi kabinalardy ańdyǵany anyqtaldy. Sot sheshimi boiynsha ol ákimshilik jaýapkershilikke tartyldy. Elorda politsiiasy bilim berý mekemelerinde mundai áreketterdiń oryn alýyna jol berilmeitinin eskertedi jáne moral men zań normalaryn saqtaýǵa shaqyrady", – delingen departamenttiń habarlamasynda.
Ol óz kinásin moiyndap, rasynda dárethana kabinkasynan video túsirgenin aitty. Jigit áielder dárethanasyna kezdeisoq kirip ketkenin alǵa tartqan.
Nazarbaev Ýniversitetiniń baspasóz qyzmeti áielder dárethanasynda video túsirgen stýdenttiń ýniversitetten shyǵarylǵanyn málimdedi. Ol endi jataqhanaǵa, kitaphanaǵa jáne ýniversitettiń basqa da nysandaryna kire almaidy.
"Ýniversitet kampýsta qaýipsizdikti qamtamasyz etý úshin qatań sharalar qabyldady. Videoǵa qatysy bar stýdent kampýstan shyǵaryldy. Sonymen qatar ýniversitet stýdentterdiń qaýipsizdigi men ál-aýqatyn qorǵaý úshin barlyq qajetti sharalardy iske asyrdy", – delingen habarlamada.
Eske salsaq, osyǵan deiin jelide Nazarbaev ýniversitetinde stýdenttiń qyzdarǵa arnalǵan dárethanany videoǵa túsirgeni týraly aqparat taraǵan edi.
