Qazaqstandyq boksshy Daniiar Eleýsinov kásipqoi boksqa aýysatyn boldy. Ol jaqynda AQSh-ta júrgen aǵasy Dáýrenniń janyna barady. Muny amerikalyq Boxing News jýrnaly málim etti, dep habarlaidy BNews.kz.
«25 jastaǵy jartylai orta salmaqtaǵy qazaqstandyq boksshy Brýklinde (Niý-Iork) promoýtera Lý Di Bellanyń qol astynda jattyǵý jasap júrgen aǵasy Dáýrenniń janyna baratyny málim boldy», - dep jazypty Boxing News.
Munyń aldynda boksshy aqparat quraldaryna bergen suhbatynda: «Aldaǵy ýaqytta ne bolaryn bir Alla ǵana biledi. Aldyn ala eshteńe aitpai-aq qoiaiyn. Ázirge eshbir promoýterden naqty usynys túsken joq» - degen edi.
Tek belgili bolǵany – reseilik Vladimir Hriýnov Eleýsinovpen jumys isteýge daiyn. Bleacher Report portalynyń habarlaýynsha, Eleýsinov kásipqoi boksqa aýysyp jatsa, uzaq jyldar boiy jartylai orta salmaqtyń úzdigi bolary sózsiz.
Aita keteiik, Daniiardyń aǵasy 31 jastaǵy Dáýren Eleýsinov áýesqoi boksta Qazaqstan chempiony bolǵan. 2014 jyly kásipqoi boksqa aýysyp, búginge deiin bas-aiaǵy 6 kezdesý ótkizdi. Bes qarsylasyn nokaýtpen utty, bir jekpe-jeginde teń tústi.
