Qarýly Kúshterde jeke quramnyń 80 paiyzdan astamy koronavirýsqa qarsy ekpe aldy. Bul týraly Qorǵanys ministrligi habarlady.
Qorǵanys ministrligindegi apparat keńesinde ótken apta qorytyndylanyp, áskerdiń qazirgi tynys-tirshiligine qatysty máseleler qaraldy.
Sonymen birge, biyl 1 maýsymda bastalatyn jazǵy oqý-jattyǵý kezeńine daiyndyq máseleleri qaraldy. Bul rette áskerlerde komandalyq quram nusqaý berý-ádistemelik sabaqtaryn, sondai-aq tehnikany, oqý-jattyǵý materialdyq bazasyn daiyndaý men poligondardy oq-dáriler qaldyqtarynan tazartýdy uiymdastyrdy.
QR Qorǵanys ministri Nurlan Ermekbaev áskeri nysandardyń diversiiaǵa qarsy qaýipsizdiginiń jai-kúiine nazar aýdardy. Osy maqsatta ol kúzet pen beinebaqylaý tehnikalyq quraldarynyń turaqty jumys isteýin, bógetterdiń jaramdylyǵyn qamtamasyz etýdi tapsyrdy. Jabdyq isten shyqqan jaǵdaida komanda boiynsha dereý baiandaýǵa jáne aqaýlyqtardy joiý jóninde sharalar qabyldaýǵa, al obektilerdiń qaýipsizdigin qamtamasyz etý úshin qarýly utqyr toptar men kezekshi kúshterdi tez arada jumyldyrýǵa tiis.
Budan ózge, laýazymdy tulǵalarǵa jeke avtokólikterdi áskeri nysandar aýmaǵyna kirgizýge tyiym salý týraly basshylyq buiryqtary men nusqaýlyqtarynyń talaptary eskertildi. Bul ereje mártebesine, laýazymdyq jaǵdaiyna jáne qandai da bir qurylymdarǵa tiesiligine qaramastan, memlekettik organdardyń birinshi basshylary men qorǵanys ministriniń ózine de qatysty.
Bul tártipti qamtamasyz etýge, diversiiaǵa qarsy qorǵanys jáne jeke tulǵalardyń zańǵa qarsy áreketterin alýǵa qajet.
Qorǵanys vedomstvosynyń basshysy Qarýly Kúshterdiń qajettilikteri úshin iske asyrylatyn memlekettik satyp alýdy ótkizýge jeke toqtaldy. Buryn jaýapsyz ónim berýshiler dep tanylǵan sýbektilerdiń konkýrstarǵa «ótinish berý» jaǵdailary jii kezdesetini atap ótildi. Ásirese armiiany qarý-jaraqpen jabdyqtaý jáne áskeri infraqurylym obektilerin paidalanýdy qamtamasyz etý siiaqty mańyzdy salalarda buǵan jol berýge bolmaidy. Atalǵan máseleni, qorǵanys ministri áskeri tehnikany satyp alýdy uiymdastyrý jónindegi ýákiletti organ bolyp tabylatyn Indýstriia jáne infraqurylymdyq damý ministrligimen jan-jaqty pysyqtaýdy tapsyrdy.
Bas áskeri-meditsinalyq basqarmanyń bastyǵy COVID-19 indetin juqtyrǵandar sanynyń azaiyp kele jatqanyn atap ótti. Máselen, aldyńǵy kezeńmen salystyrǵanda ótken aptada syrqattaný 39 paiyzǵa tómendegeni baiqaldy. Mundai kórsetkish jeke quramdy vaktsinatsiialaýdyń nátijesimen bailanysty. 11 mamyrdaǵy jaǵdaiy boiynsha áskeri qyzmetshiler men azamattyq personal ókilderiniń 80%-dan astamy koronavirýsqa qarsy ekpe aldy. Onyń ústine, qalǵan 20 paiyzy – qazirgi ýaqytta demalysta, uzaq issaparda júrgender, sondai-aq meditsinalyq qarsy kórsetilimderi bar adamdar.
