COVID-19 indetine qarsy vaktsina 2022 jyly paida bolýy múmkin.
«Bas redaktorlar klýby» qoǵamdyq birlestiginiń prezidenti, belgili mediamenedjer Bibigúl Jeksenbaimen Instagram arqyly suhbattasqan, meditsina ǵylymdarynyń doktory, professor, DDSU-da qyzmet etken Maqsut Quljanov osyndai boljamymen bólisti, dep habarlaidy QazAqparat.
«Koronavirýs – adamnyń aǵzasyn óte qatty zaqymdaityn virýs. Máselen tumaý qaýipti desek te, ol adamnyń aǵzasyna qatty zaqym ákelmeidi. Bul virýstyń ózgesheligi – munymen kúresý óte qiyn. Jańa virýs bolǵannan keiin halyq ta, meditsina qyzmetkerleri ol týraly bilgen joq. Kún saiyn osy virýstyń qanshalyqty qaýipti ekenin bilip otyrmyz. Bul bir. Ekinshiden, koronavirýstyń ainalasynda ártúrli áńgime tarap júr. Ádeii qoldan jasalǵan degen pikir de basym. Kóbi jalǵan. Bul virýstyń shyqqan ýaqyty – 2019 jyldyń aiaǵy dep jariialandy. Múmkin odan da erterek shyqqan bolar. Biraq meniń senetinim – bul virýs tabiǵattan shyqqan», - dedi Maqsut Quljanov.
Professordyń aitýynsha, aldaǵy 1-2 jylda adamzattyń bul virýsty jeńýi qiyn.
«Koronavirýs adamzatqa keldi – endi shyqpaidy dep oilaimyn. Tumaý siiaqty bunymen de qaita-qaita kúresý kerek. Bul – bárimizge ortaq synaq», - dedi ol.
Maqsut Quljanov koronavirýsqa qarsy vaktsina tabý – aldaǵy 2-3 aidyń jumysy emes. Tarihqa taldaý jasasaq, bir aýrýǵa jańa vaktsina 8-10 jyl jasalady.
«Árbir institýttyń vaktsina jasaýdaǵy jumys satylary bolady. Bir satydan da attap ótýge kelmeidi. Múmkin keibir ǵylymi ortalyqtar osy kezeńderdi qysqartyp shyǵarýy múmkin. Bul vaktsina shyǵarýdyń etikalyq zertteýleri de baryn atap ótý kerek. Eń bastysy bul ekpe – adamǵa zaqym keltirmeýi kerek. Óte qiyn sharýa. Qazirgi keibir ǵylymi ortalyqtar BAQ-qa «vaktsinany tájiribeden shyǵardyq, klinikalyq satysyna kóshtik» dep jariialap jatyr. Biraq meniń oiymsha kelesi jyldan erte vaktsina shyqpaidy. Realistik turǵydan qaraǵanda vaktsina 2022 jyly daiyn bolýy múmkin. Ár eldiń ǵylymi ortalyqtary dárini bolsyn, vaktsinany bolsyn saraptaidy. Odan ótpeý múmkin emes. Bizdiń elde de sondai jumys júrgizilip jatyr», - dedi ol.
