Foto: Dmitrii Matveev / ratel.kz
Búgin, 17 naýryz – Shańyraq kúni, dep habarlaidy Ult.kz.
Bul kún súiispenshilik, qurmet, senim, ózara kómek, meiirimdilik, janashyrlyq, anaǵa qurmet jáne urpaq súiý siiaqty otbasylyq qundylyqtardy nasihattaýǵa arnalǵan.
Qazaq mádenietinde shańyraqtyń qadir-qasieti airyqsha. Ol – ári aspan kúmbezi, ári úi-jai, ári tirek, ári baqýattylyq pen qaýipsizdik jáne urpaqtar sabaqtastyǵy. Ol – urpaqtan-urpaqqa jalǵasyp kele jatqan materialdyq jáne rýhani mura, sonymen qatar otbasynyń turaqtylyǵy men urpaqtyń úzdiksiz jalǵasýynyń simvoly.
Qazaq dúnietanymynda shańyraq – sheńberdiń simvoly, iaǵni kim-kimdi de kemsitpei óz ortasyna qabyldai alý qabiletin bildiredi.
Jahandyq turǵydan alǵanda, shańyraq ulttyq sana-sezimdegi el, memleket uǵymyn beineleidi, sondyqtan da ol eltańbanyń júreginde ornalasqan. Endeshe, osy mereke kúnderi shańyraqqa erekshe kóńil bólinetini túsinikti jait bolsa kerek.
Jalpy, «Shańyraq» kúni eldegi jas urpaqty tárbieleý isin durys jolǵa qoiyp, olardyń boiynda patriotizm, adamgershilik, bilimqumarlyq pen eńbekqorlyqqa degen qushtarlyqty qalyptastyrýǵa sep bolady.
