E-hr júiesi eńbek shartyn jasaý kezinde eńbek kitapshalarynan jáne qaǵaz qujattardan bas tartýǵa múmkindik beredi, dep habarlaidy "Ult aqparat".
Eńbek sharttaryn esepke alýdyń biryńǵai júiesi (E-hr) kásiporyndardyń kadrlyq bólimderinde qyzmetkerlerdi resimdeý ýaqytyn qysqartýǵa kómektesedi. «Eńbek resýrstaryn damytý ortalyǵy» AQ jumysqa ornalasý kezinde qajetti qaǵaz qujattardy qajet etpeitin E-hr júiesin engizdi. Endi kadr qyzmeti barlyq qajetti qujattardy ( jeke kýálik derekteri, bilimi, turatyn jeri, densaýlyq, sottylyǵynyń bar-joǵy ) derbes jáne elektrondy túrde ala alady.
«E-hr júiesi azamattardyń eńbek ótili boiynsha derekterdiń saqtalýyn jáne naqty derek qoryn qalyptastyrady. Jumys berýshimen qyzmetker arasyndaǵy kelisim-sharttyń ashyq bolýyn, qujattardy qoldan jasaý qaýpin joiady. Bastysy jumysqa ornalasýdy jedeldetedi. Sondai-aq, eńbek shartyn jasaý kezinde eńbek kitapshalarynan jáne qaǵaz qujattardan bas tartýǵa múmkindik beredi», - dedi «ERDO» AQ Derekterdi taldaý jáne óńdeý departamentiniń direktory Bahtiiar Jazyqbaev.
Kásiporyndarǵa jańa servisti paidalaný úshin bar bolǵany E-hr júiesine tirkelý qajet. Jańa jumysshynyń «jeke isine» qujattar jinaý úshin onyń kelisimin alyp, júiege suraý salý kerek. Ári qarai baǵdarlama barlyǵyn ózi avtomatty túrde jasaidy.
Qazirgi ýaqytta E-hr QR Bilim jáne ǵylym ministrliginiń aqparattyq júielerimen, sondai-aq QR Ádilet ministrliginiń jeke tulǵalardyń memlekettik bazasymen integratsiia jasalǵan. 2020 jyldyń sońyna deiin QR Densaýlyq saqtaý ministrliginiń jáne QR Bas prokýratýrasynyń Quqyqtyq statistika jáne arnaiy esepke alý jónindegi komitetiniń aqparattyq júiesimen biriktirý josparlanýda.
Esterińizge salsaq, E-hr júiesi 2018 jyldan bastap pilottyq rejimde jumys isteidi. Qazirgi ýaqytta júiege erikti negizde 28 myńnan astam qazaqstandyq kompaniia qosyldy. Búginde E-hr-da 1,3 mln elektrondyq eńbek sharty tirkelgen. 2020 jyldyń birinshi jartysynda júiege taǵy 25 myńǵa jýyq jumys berýshini qosý josparlanyp otyr.
