Pandemiia bastalǵannan beri búkil álemde SARS-CoV-2 koronavirýsyn 13,9 mln adam juqtyryp, 591 myńnan astam adam qaitys boldy. 8,2 mln astam patsient jazyldy, dep habarlaidy DW.
Álem qaýymdastyǵy SARS-CoV-2 koronavirýsyna qarsy kúresti jalǵastyryp keledi. Pandemiia bastalǵaly ǵalamshardyń 13,9 mln astam turǵynynan infektsiia anyqtalǵan. Indet juqtyrý saldary men odan bolatyn COVID-19 ókpe dertinen 591 myńnan astam adam qaitys bolǵan, 8,2 mln astam naýqas jazyldy. Bul - Worldometer halyqaralyq eriktiler tobynyń málimeti.
Beisenbi kúni AQSh-tyń aýrýlardy baqylaý jáne aldyn alý ortalyqtary (CDC) AQSh aýmaǵynda jumys isteitin krýizdik kompaniialardyń júzýine salǵan tyiymdy qyrkúiek aiynyń sońyna deiin sozdy. Eger AQSh Densaýlyq saqtaý ministrliginiń basshysy qoǵamdyq densaýlyq saqtaý salasynda COVID-19 indetine bailanysty tótenshe jaǵdaidy alyp tastasa, bul tyiym alynatyny da atap ótiledi.
Robert Koh atyndaǵy institýttyń (RKI) málimetinshe, sońǵy táýlikte Germaniiada SARS-CoV-2 juqtyrýdyń 583 jańa oqiǵasy anyqtaldy. Epidemiia bastalǵaly tirkelgen oqiǵalardyń jalpy sany 200 843 adamǵa deiin ósken. COVID-19 indetinen 9082 patsient kóz jumdy.
AQSh-ta bir kúnde aýrý juqtyrýdyń jańa eń joǵary kórsetkishi tirkelgen - 75255 oqiǵa. Maýsym aiynda ol 30 myńnan aspaǵan edi. Sarapshylar kóp uzamai táýligine aýrýǵa 100 myń adam shaldyǵatynyna qaýiptenip otyr.
