«Bolashaq» baǵdarlamasy sheńberinde 2020 jyly oqýǵa usynylatyn sheteldik joǵary oqý oryndarynyń tizimi bekitildi, dep habarlaidy "Ult aqparat" «Halyqaralyq baǵdarlamalar ortalyǵy» AQ-nyń baspasóz qyzmetine silteme jasap.
QR Bilim jáne ǵylym ministriniń 2020 jylǵy 13 shildedegi № 295 Buiryǵymen 2020 jyly «Bolashaq» baǵdarlamasy sheńberinde oqýǵa usynylatyn sheteldik joǵary oqý oryndarynyń tizimi bekitildi.
«Bolashaq» halyqaralyq stipendiiasyn taǵaiyndaý úshin úmitkerlerdi irikteýdiń jańa erejelerine engizilgen ózgeristerdiń nátijesinde sheteldik joǵary oqý oryndarynyń tizimi sapalyq jáne sandyq jaǵynan ózgerdi.
Tizimge QS World University Rankings, Academic Ranking of World Universities, Times Higher Education World University Rankings, the U. S. News & World Report Best Global University ranking halyqaralyq reitingteriniń keminde ekeýiniń TOP-100-digine kirgen joǵary oqý oryndary kirdi.
Tizimge sonymen qatar, The U.S. News & World Report Best Global University Ranking basylymynyń nusqasy boiynsha úzdik álemdik ýniversitetter reitinginde keminde 65 ball jinaǵan Ekonomikalyq yntymaqtastyq jáne damý uiymy (EYDU) elderiniń joǵary oqý oryndary endi.
Salystyratyn bolsaq, 2019 jyly usynylǵan sheteldik joǵary oqý oryndarynyń tiziminde 537 joǵary oqý orny bolsa, onyń 20% ǵana top-100 halyqaralyq reitingterine kirgen.
Sondyqtan, 2020 jylǵy tizimde elimizdiń qajettilikterine sáikes baǵyttar boiynsha myqty bolyp sanalatyn álemniń jetekshi joǵary oqý oryndary usynylýda.
Usynylatyn sheteldik joǵary oqý oryndarynyń tizimimen «Halyqaralyq baǵdarlamalar ortalyǵy» AQ resmi saitynda kelesi silteme boiynsha tanysýǵa bolady.
