Bokstan Aziia chempionatynda búgin alǵashqy jekpe-jegin ótkizgen tórt qazaqstandyq sportshynyń ekeýi jarysty jalǵastyrady, dep habarlaidy "Ult aqparat".
Qurlyqtyq dodada Zakir Safiýllin (64 keli) sharshy alań tórindegi alǵashqy kezdesýinde qarsylasynan basymdyq tanytty. Ol irandyq Ashkan Rezaidyń osal tusyn tapty.
Al Ábilhan Amanqul (75 keli) jekpe-jek ótkizbesten jarystyń kelesi satysyna joldama aldy. Ol búgin kýveittik Said Abass Al-Bahranimen sheberlik baiqasýy qajet bolatyn. Qarsylasy sharshy alańǵa shyǵýdan bas tartty.
Qazaqstandyq Mahmýd Sabyrhan (56 keli) men Serik Temirjanov (60 keli) qarsylastaryna ese jiberip, jarys jolynan shyǵyp qaldy.
Eske salsaq, Aziia chempionaty Birikken Arab ámirliginiń Dýbai qalasynda 24 mamyrda bastalyp, 31 mamyrǵa deiin jalǵasady. Qurlyqtyq dodada elimizdiń jigitter men qyzdar quramalary baq synaýda.
