Qazaqstan men Resei shekarasynda reseilik «Mashtakov» avtomobil ótkizý beketinde búgin 365 júk kóligi turyp qaldy, dep habarlaidy "Ult aqparat".
BQO memlekettik kirister departamentiniń baspasóz qyzmeti málim etkenindei, Qazaqstan aýmaǵyndaǵy «Syrym» keden beketinde kezek joq.
Avtokólik keptelisi reseilik «Mashtakov» avtomobil ótkizý beketinde júk kólikterin tolyq qaraýdan ótkizý úshin tehnologiialyq ótýdiń mindetti túrde bolýy talap etiledi. Ol bolmaǵan jaǵdaida RF Shekara qyzmeti júrgizýshiden tirkemeden júktiń bir bóligin túsirýdi talap etedi. Osylaisha ár júk kóligin qaraý úshin orta eseppen 40 minýt ýaqyt ketedi.
Sonymen qatar Resei Shekara qyzmeti júk quralynyń saqtandyrý polisi, júrgizýshiniń kartochkasy, sertifikattar syndy qujattardy tekseredi.
«Syrym» jáne «Mashtakov» beketterinen kedergisiz ótý úshin tehnologiialyq ótý jabdyǵy sharttaryn saqtaý qajettigine júk kólikteri júrgizýshileriniń nazaryn aýdarǵymyz keledi. Sonymen qatar kólik keptelisi bolmas úshin halyqaralyq júk tasymaldaýshylarǵa qatysty talaptar saqtalyp, avtomobil men júkke tiisti qujattar bolýy tiis. Syrtqy ekonomikalyq qyzmetke qatysýshylar jolǵa shyǵar aldynda Reseimen shekaradaǵy qozǵalys baǵytyn naqtylap alǵany jón», dedi BQO memlekettik kirister departamenti túsindirý jumystary jónindegi bóliminiń basshysy Aiman Qýanova.
Qazaqstan men Resei shekarasynda osyndai kólik keptelisi budan buryn da oryn alǵan edi.
