foto: www.istockphoto.com
Batys Qazaqstan oblysynda sheneýnik kámeletke tolmaǵan qyzǵa qatysty zorlyq jasaǵany úshin aiyptaldy, dep habarlaidy Ult.kz.
Jábirlenýshiniń ákesi, 68 jastaǵy azamat, qyzynyń aldanǵanyn jáne kúdiktiniń oǵan kúsh qoldanǵanyn aitqan. Onyń sózinshe, aryzdan keiin kúdikti ustalǵan, biraq keiin bosatylǵan. Sonymen qatar, ákesi Shyńǵyrlaý aýdandyq politsiia bóliminiń tergeýdi jetkilikti deńgeide júrgizbei otyrǵanyn málimdedi.
BQO Politsiia departamenti habarlaǵandai, 2 qańtarda Aqsai qalasynda 16 jastaǵy qyzǵa qatysty zańsyz áreket jasalǵany týraly habarlama túsken. Qylmystyq is Qylmystyq kodekstiń 120-baby 3-1-bóligi 1-tarmaǵy ("Kámeletke tolmaǵandy zorlaý") boiynsha qozǵalǵan.
Politsiia tergeý barysynda hat almasý jáne basqa da mańyzdy derekterdi anyqtaǵan. Tergeý nátijesinde kámeletke tolmaǵanǵa qatysty kúsh qoldaný deregi rastalmaǵan. Jábirlenýshi jáne onyń anasy kúdiktiden eshqandai shaǵymy joq ekenin aityp, qarym-qatynastyń ózara kelisimmen bolǵanyn málimdegen.
Kúdikti aýdandyq ákimdik bóliminiń qyzmetkeri bolǵan jáne aryz túskennen keiin qyzmetinen bosatylǵan. Tergeý qazir de jalǵasyp jatyr, is politsiia departamenti basshylyǵynyń baqylaýynda.
Jábirlenýshiniń ákesi jańa málimdeme jasap, sheneýnikti jazalaýdy talap etti. Ol "Ýralskaia nedelia" basylymyna bergen suhbatynda, áieli men qyzynyń qysymǵa ushyraǵanyn jáne bastapqyda aryzdan bas tartýǵa májbúr bolǵanyn aitty. Ákesi politsiiaǵa aryzdan bas tartpaitynyn jáne isti sotqa deiin jetkizetinin atap ótti.
Onyń aitýynsha, kúdikti óz aiybyn moiyndaǵan, biraq keiin advokattar arqyly oqiǵany basqa qyrynan sipattaǵan. Ákesi sondai-aq qarjylyq usynystar jasalǵanyn jáne olardan bas tartqanyn jetkizdi: "Bul qyzymnyń taǵdyryna keri áserin tigizer edi".
Ákesi ádil tergeýdi jáne kináli adamnyń sot aldynda jaýap berýin talap etetinin aitty. Sonymen qatar, ol osy sheneýnikten taǵy bir kámeletke tolmaǵan qyz zardap shekkenin jáne sol otbasynyń politsiiaǵa júginbegenin málimdedi.
