Batys Qazaqstan oblysynyń ákimi Ǵali Esqaliev «jaiylymdardy kiik basyp aldy» dep shaǵymdanǵan fermerler máselesi qalai sheshiletinin aitty, dep habarlaidy "Ult aqparat".
Buǵan deiin áleýmettik jelide sharýalar mal jaiylymyna arnalǵan jerlerdi kiik basyp jatyr degen video taratty.
«Bul - bir ǵana Jánibek aýdanynyń problemasy emes, munda tórt aýdan bar. Jaqynda Ekologiia ministri Maǵzum Myrzaǵaliev Prezidenttiń tapsyrmasy boiynsha keldi. Biz sheshim qabyldap, jergilikti halyqpen, fermerlermen, ǵalymdarmen talqylaý júrgizdik. Qazir jasaýǵa bolatyn sheshimder bar jáne ǵylymi zertteýlerdi, taldaýdy qajet etetin sheshimder bar. Biyl jalpy aýdany 650 myń gektarǵa jýyq rezervat pen qaýmal quramyz degen Prezident Ákimshiliginiń kelisimi bar. Biraq bul barlyq máseleni sheshpeidi, bul máseleni birtindep rettei bastaimyz. Kiiktiń qozǵalysyn retteitin 78 inspektor bolady», - dep jaýap berdi ákim Ortalyq kommýnikatsiialar qyzmetinde ótken brifingte.
Onyń aitýynsha, máseleni jergilikti jerde mamandar men ǵalymdar zerttep jatyr jáne arnaiy jumys toby quryldy.
«Sýdyń joqtyǵynan kiikter ketken jerderdi, alańdardy sýlandyrý kerek. Qazir biz sýdy zerttep jatyrmyz. Jaiylymdar boiynsha Jaiyqtyń sol jaǵasynda úlken rezervter bar. Biz qazir qosymsha jaiylym jerlerin ainalymǵa engizýge múmkindik beretin úsh arnany rekonstrýktsiialaýdy bastaimyz. Onda jabaiy janýarlardy kóshirý qiyn bolýy múmkin, biraq bul jumystardy ǵalymdardyń kómegimen jasaimyz. Bul fermerlerge ózderine qosymsha jaiylym alýǵa múmkindik beredi. Prezidenttiń kiik pen sharýa qojalyqtary malyna qatysty ymyraǵa kelý týraly tapsyrmasy bar. Biz tepe-teńdikti izdeimiz», - dedi Ǵali Esqaliev.
