Batys Qazaqstan oblysynyń ákimi Ǵali Esqaliev óńirdegi gazdandyrý jáne sýmen qamtý sharalaryn baiandady, dep habarlaidy "Ult aqparat".
«Biyl 36 aýyldy gazben qamtý josparlanyp otyr. Nátijesinde oblys turǵyndaryn tabiǵi gazben qamtý úlesi 99,5%-dy quraityn bolady», - dedi óńir ákimi Ǵali Esqaliev Ortalyq kommýnikatsiialar qyzmetinde ótken baspasóz máslihatynda.
Ákimniń aitýynsha, 21 eldimekendi sýmen qamtý úshin 5,3 mlrd teńge qarastyrylǵan.
Jyl sońyna deiin aýyl turǵyndaryn ortalyqtandyrylǵan sýmen qamtý 90%-ǵa deiin ósedi.
Sonymen birge, Prezident tapsyrmasy aiasynda 250-den astam turǵyny bar 68 aýylda mobildi internet júrgizilgen.
«Búgingi tańda oblys halqynyń 96%-y mobildi bailanyspen qamtamasyz etilgen. Degenmen, uialy bailanys pen internettiń sapasy máselesi áli de bar. 2021 jyly uialy bailanysy joq halqy az 95 aýyldy uialy bailanyspen qamtamasyz etý máselesin sheshýdi josparlap otyrmyz», - deidi óńir ákimi.
