Batys Qazaqstan oblysynda COVID-19 juqtyrý deńgeii azaidy. Bul týraly óńir ákimi Ǵali Esqaliev aityp berdi, dep habarlaidy "Ult aqparat".
«Óńirdegi epidemiologiialyq jaǵdai jiti baqylaýda. Sońǵy aptada 658 juqtyrý faktisi anyqtaldy. Aldyńǵy aptamen salystyrǵanda naýqastar sany 9%-ǵa azaidy. Oblystyń eki ai boiy qyzyl aimaqta ornalasqanyn eskere otyryp, aýdan turǵyndarynyń oblys ortalyǵyna kelýin azaitý úshin 1 mamyrdan bastap 14 kún boiy Oral qalasy men qyzyl aimaqta ornalasqan 6 aýdan perimetri boiynsha blok beketter ornatyldy», - dedi Ǵ. Esqaliev Ortalyq kommýnikatsiialar qyzmetinde ótken baspasóz máslihatynda.
Ákimniń aitýynsha, bul sharalar oblys ortalyǵyna turǵyndar aǵynyn 35%-ǵa azaitýǵa jáne buqaralyq is-sharalardyń ótýine jol bermeýge kómektesken.
Nátijesinde, sáýir aiynda aýrý kórsetkishi táýligine 200-250-den tirkelse, mamyr aiynda – 90-100 jaǵdaiǵa deiin tómendegen.
«Monitoring toptary 1 mamyrdan bastap 179 reid júrgizdi, 965 nysan tekserildi. Joǵaryda atap ótkenimdei, epidemiianyń jappai taralýyna jol bermeý úshin Úkimet birqatar shara qabyldady, sonyń arqasynda jaǵdai baqylaýda ustap otyrmyz», - dedi Esqaliev.
