Foto: ashyq derekkóz
Batys Qazaqstan oblysynda aýyl joldaryn jóndeýge bólingen 56,5 million teńgeni jymqyrǵandardyń isi sotqa joldandy. Qarjylyq monitoring agenttiginiń óńirlik departamenti biýdjet qarajatyn iemdený faktisi boiynsha júrgizilgen tergeýdi aiaqtady, dep habarlaidy Ult.kz.
Tergeý málimetterine sáikes, 2023 jyldyń naýryz aiynda Syrym aýdandyq turǵyn úi-kommýnaldyq sharýashylyǵy, jolaýshylar kóligi jáne avtomobil joldary bólimi men «Sapak» óndiristik kooperativi arasynda Jympity aýylyndaǵy joldardy kúrdeli jóndeý týraly 259 mln teńgege kelisimshart jasalǵan. Alaida «Sapak» kooperativiniń direktory men «Ak-Bi» JShS basshysy ózara sóz bailasyp, senip tapsyrylǵan memleket qarajatyn iemdenýdiń qylmystyq shemasyn uiymdastyrǵan. Kúdiktiler oryndalǵan jumystar aktilerine asfalt tóseý, jer qazý, betondaý jáne sý qubyrlaryn júrgizý jumystary tolyq atqaryldy dep júieli túrde jalǵan málimetter engizip otyrǵan. Is júzinde bul jumystar múldem oryndalmaǵan nemese kórsetilgen kólemnen áldeqaida az atqarylǵan.
Osy jalǵan aktiler negizinde aýdarylǵan biýdjet qarajaty keiin qylmystyq shemaǵa qatysýshylar arasynda bólinip, memleketke 56,5 mln teńge kóleminde materialdyq zalal keltirilgen.
Sot sanktsiiasymen kúdiktilerdiń biriniń páterine tyiym salynyp, olarǵa qatysty eshqaida ketpeý týraly qolhat túrindegi bultartpaý sharasy qoldanyldy. Aita keterligi, buǵan deiin atalǵan memlekettik mekemeniń basshysy laýazymdyq ókilettikterin teris paidalanǵany úshin sot úkimimen kináli dep tanylǵan bolatyn. Qazirgi ýaqytta qylmystyq is sotqa joldandy.
