Biyl Saraishyq qalashyǵy bas qaqpasynyń aýmaǵy jańǵyrtylady. Bul jaiynda Senat depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Saraishyq qalashyǵynyń qazaq eliniń tarihyndaǵy orny ǵylymi derektermen, zertteýlermen, artefaktilermen aiqyndalǵan. Qazirgi tańda maqsatymyz qalashyqty saqtap, urpaqtan-urpaqqa jetkizý. Osy oraida, Saraishyq qalashyǵynyń artefaktilerin jyldan-jylǵa shaiyp kelgen Jaiyq ózeniniń jaǵalaýlaryn bekitý máselesi 2016 jyly sheshilip, tarihi orynnyń sýǵa aǵyp ketý qaýpi toqtatyldy. Saraishyq qalashyǵynyń tarihi mańyzdylyǵy eskerile otyryp, buryn kommýnaldyq menshikte bolǵan Saraishyq mýzei-qoryǵy 2018 jyly respýblikalyq deńgeidegi, ejelgi qalashyq aýmaǵynda arheologiialyq jumystar jáne ǵylymi zertteýler júrgizýge baǵyttalǵan uiym retinde qaita quryldy. Qalashyq aýmaǵynda arheologiialyq jumystar mýzei-qoryq ázirlegen ǵylymi jobalar aiasynda iske asyrylady», - delingen Úkimet basshysynyń jaýabynda.
Jariialanǵan málimetke sáikes, qazirgi kezeńde mýzei-qoryq usynǵan úsh joba Ulttyq ǵylymi keńeste talqylanýda. Ǵylymi jobalar Ulttyq ǵylymi keńestiń oń saraptamasyna ie bolǵannan keiin respýblikalyq biýdjetten qarjylandyrylady. 2020 jyly júrgizilgen arheologiialyq jumystardyń nátijesi boiynsha qalashyq aýmaǵyndaǵy turǵyn jailar konservatsiialanyp, olardyń tarihi kelbetin qalpyna keltirý jumystary júrgizilýde. Búgingi tańda tarihi kesenelerdiń qabyrǵalary, tandyr oshaqtary jáne basqa nysandary jańǵyrtyldy. Al 2021 jyly qalashyqtyń bas qaqpasy aýmaǵyn jańǵyrtý josparlanǵan. Tarihi artefaktilerin qalpyna keltirý kezeń-kezeńimen ǵalymdardyń derekterine súiene otyryp júrgiziledi. Sonymen qatar, QR týristik salasyn damytýdyń 2019-2025 jyldarǵa arnalǵan memlekettik baǵdarlamasyna sáikes orta ǵasyrlyq Saraishyq qalashyǵy óńirlik deńgeidegi týristendirý kartasy nysandarynyń tizbesine (TOP-50) engizilgen.
«Saraishyq qalashyǵyna kelýshiler men týristerge ońtaily jaǵdai týǵyzý maqsatynda «Saraishyq vizit-ortalyǵynyń» qurylysy boiynsha jobalaý-smetalyq qujattamasy ázirlendi. Búgingi kúni onyń qurylysyna qajetti qarajat qarastyrylýda. Eski Saraishyq aýylynyń qazirgi aýmaǵy, sondai-aq zirat pen ortaǵasyrlyq qalanyń tarihi-arheologiialyq turǵydan zertteletin bóligi eskertkish aimaǵyna kirgendikten munda qurylystyń kez-kelgen túrine tyiym salynǵan. Bul rette eski Saraishyq aýylynyń turǵyndaryn (úi sany – 97, halyq sany 771 adam) jaqyn mańdaǵy Saraishyq aýyldyq okrýgindegi bos jer ýchaskesine birtindep kóshirý josparlanýda. Mádeniet jáne sport ministrligi men Atyraý oblysy ákimdigine múddeli memlekettik organdarmen birlesip zańnamada belgilengen tártippen vizitortalyǵynyń qurylysyna qajetti qarajatty qarastyrýdy jáne aýyl turǵyndaryn kóshirý máselesin sheshýdi jedeldetý týraly tapsyrma berildi», -dep atap ótedi Asqar Mamin jaýabynda.
Esterińizge sala ketsek, Atyraý oblysynyń áleýmettik-ekonomikalyq damý máseleleri jónindegi keńeste Memleket basshysy Qasym-Jomart Toqaev Saraishyq ortalyǵy qurylysyna qatysty máseleni dereý sheshýdi tapsyrǵan bolatyn.
