Biyl qazaqstandyqtar koronavirýsqa bailanysty qajylyqqa bara almaidy. Bul jóninde Saýd Arabiiasynyń qajylyq jáne umra ministrligine silteme jasaǵan Qazaqstan musylmandarynyń dini basqarmasy habarlady.
Álemdi sharpyǵan koronavirýs keseline bailanysty biyl qajylyqqa kelýshiler kólemi aitarlyqtai shekteledi.
«Koronavirýs indeti álemniń 180-nen astam eline taralyp, COVID-19 virýsynan ajal qushqandar sany 1 millionǵa jetti. Odan bólek 7 million adamnyń virýs juqtyrǵany belgili boldy. Osyǵan orai Saýd Arabiiasynyń Densaýlyq saqtaý ministrligi pandemiiadan týyndaǵan qaýip-qaterdiń aldyn alý jáne onyń taralýyna jol bermeý, sondai-aq jahandyq densaýlyq saqtaý uiymdarynyń talaptaryn eskere otyryp biylǵy qajylyq rásimine birqatar shekteý qoidy» dep málim etti basqarma.
Saýd Arabiiasy Koroldiginiń basty mindeti – musylman qajylarǵa qajylyq jáne umra rásimderin qaýipsiz oryndaýǵa árqashan múmkindik jasaý. Pandemiia bastalǵaly beri qajylardy qorǵaý úshin barlyq saqtyq sharalary qabyldanyp, qasietti oryndarǵa syrttan kelýshiler shekteldi.
«Qasietti jerlerde júrgen qajylardyń qaýipsizdigin qamtamasyz etý maqsatynda, Islam elderi men jáne halyqaralyq uiymdardyń talaptaryn eskere otyryp, shekteýlerdi ári qarai kúsheite tústik. Sebebi bizge saldary ólimge ákeletin qaýipti indettiń aldyn alý mańyzdy. Koronavirýs infektsiiasy adamdar kóbirek jinalatyn oryndarda, úlken jiyndarda taralatyny dáleldenip otyr. Sondyqtan da biylǵy 1441 jyldyń (2020 jyl) qajylyq rásimi Saýd Arabiiasynda turyp jatqan óte az kólemdegi adamdardyń qatysýymen ǵana ótetini jaily sheshim qabyldandy. Bul sheshim qaýipti virýstyń aldyn alý jáne qajylardyń densaýlyǵyn saqtaý maqsatynda jasalyp otyr» delingen Saýd Arabiiasynyń qajylyq jáne umra ministrligi málimdemesinde.
Aita keteiik, búginde Saýd Arabiiasy koronavirýs indetin juqtyrý deregi boiynsha arab elderi arasynda alǵashqy orynda tur. Bul elde 160 myńnan astam adamnyń qaýipti virýs juqtyrǵany belgili boldy.
