Foto: TASS
Prezidenttiń azamattardy qoljetimdi turǵyn úimen qamtamasyz etý jáne qurylys salasyn damytý jónindegi tapsyrmalaryn oryndaý aiasynda 2025 jyly 20 mln sharshy metrden astam turǵyn úi paidalanýǵa berildi. Bul týraly Úkimet otyrysynda ónerkásip jáne qurylys ministri Ersaiyn Naǵaspaev málimdedi, dep habarlaidy Ult.kz.
Boljamǵa sáikes, 2026 jyly turǵyn úidi paidalanýǵa berý kólemi 18,5 mln sharshy metrdi quramaq. Bul rette, eger turǵyn úi qurylysyn yntalandyrý sharalary kúsheitilse, kórsetkish ósýi múmkin. Ersaiyn Naǵaspaevtyń aqparaty boiynsha negizgi jumystar Astana, Almaty jáne Shymkent qalalarynda júrgiziledi.
Osy maqsattarǵa qol jetkizý úshin elimizde qurylys alańdaryn qarjylandyrýdan bastap ipotekalyq baǵdarlamalardy keńeitýge deiingi keshendi qoldaý sharalary júzege asyrylatyn bolady.
Ónerkásip ministrliginiń málimetinshe, ótken jyly kezekte turǵandar úshin 218 mlrd teńgege jalǵa beriletin 14,5 myń páter satyp alynǵan, al «nesielik turǵyn úi» jelisi boiynsha 140 mlrd teńgege taǵy da 14 myń páter salyndy jáne satyp alyndy.
Memlekettik baspanalar jeńildikpen beriletin 2% jáne 5%-dyq nesielerdiń arqasynda qarjylai qoljetimdi bolyp otyr. Olardy 5 myńnan astam otbasy paidalandy. Al oǵan qosymsha «Naýryz» jáne «Naýryz-Jumysker» baǵdarlamalary arqyly taǵy jalpy somasy 233 mlrd teńge bolatyn 8,6 myń zaem berildi.
"Byltyr azamattarǵa 8 myńǵa jýyq jalǵa beriletin turǵyn úi jáne 11 myńnan astam jeńildikti ipotekalyq qaryz berildi. Budan basqa, zańǵa engizilgen túzetýler buryn «satyp alý quqyǵynsyz» berilgen jalǵa beriletin turǵyn úidi jekeshelendirý quqyǵyn berdi, ótken jyly bul múmkindikti 15 myńnan astam azamat paidalandy. Sondai-aq, 11 myńnan astam adam jaldaý aqysynyń bir bóligine sýbsidiialardy paidalandy, bul maqsattarǵa 7,6 mlrd teńge bólindi", — dep atap ótti Ersaiyn Naǵaspaev.
Onyń aitýynsha, biyl bul jumystar jalǵasady. Taǵy 11,5 myń páter salý úshin 155 mlrd teńgege jergilikti atqarýshy organdardyń baǵaly qaǵazdaryn satyp alý, sondai-aq 18 myńnan astam jańa jeńildikti qaryzdar berý josparlanǵan.
