Elimiz boiynsha Ulttyq biryńǵai testileý (UBT) synaǵy 2020 jyldyń 20 maýsymy men 5 shilde aralyǵynda ótedi, dep habarlaidy QazAqparat.
«Biylǵy jyly elimiz boiynsha mektep bitirýshilerden UBT tapsyrýǵa 131 683 ótinish kelip tústi. Nur-Sultan qalasy boiynsha aitar bolsaq, biylǵy 6515 mektep bitirýshi túlektiń 96% atalǵan test synaǵyn tapsyrýǵa niet bildirip otyr», - dedi Nur-Sultan qalasynyń bilim salasyndaǵy sapany qamtamasyz etý departamentiniń basshysy Baǵymgúl Kóptileýova ákimdikte ótken baspasóz máslihatynda.
Sondai-aq, departament basshysy túlekterge attestat tapsyrý sharasyna qatysty arnaiy erejeni tanystyryp ótti.
«Aldaǵy 3-4 maýsym kúnderi elimiz boiynsha mektep bitirýshi túlekterge attestat tapsyrý jiynyn ótkizý josparlanýda. Bul shara mekteptiń árbir synyby úshin jeke túrde sanitarlyq erejelerdi saqtai otyryp, iaǵni ashyq alańdarda uiymdastyrylýy qajet. Ministrliktiń buiryǵymen bekitilgen tujyrymdamaǵa sáikes, mektep túlekteri mindetti túrde maska kiiýi tiis jáne ár oqýshynyń arasy 2 metr qashyqtyqta bolýy shart. Sharanyń uzaqtyǵy 20 minýttan aspaýy kerek jáne oǵan ózge adamdardyń qatysýyna tyiym salynady», - dedi ol.
Aita ketsek, búgin elorda ákimdiginde «Pedagog mártebesi týraly» zań talaptaryn júzege asyrý jáne Nur-Sultan qalasynyń bilim salasynda sapany qamtamasyz etý departamentiniń pandemiia kezindegi atqarǵan jumystaryna arnalǵan baspasóz máslihaty ótti.
