Nur-Sultan qalasynyń ákimi Altai Kólginov Instagram paraqshasynda elordanyń eldi mekenderin gazdandyrý barysy týraly aitty, dep habarlaidy "Ult aqparat".
«Kúzde taǵy jeti eldi mekendi gazben qamtamasyz etemiz. Ońtústik-Shyǵys (Iýgo-Vostok) eldi mekeni tolyqtai gazben qamtylady. Biz syrtqy jelilerdi júrgizgennen keiin turǵyndar úidiń ishine júrgizip, qajetti jabdyqtardy satyp alýy kerek jáne t.b. Osydan keiin kómir satyp alý, ony saqtaý, sapasy sekildi problemalardy oilaýdyń qajeti bolmaidy.
Qalany aralaý barysynda Ońtústik-Shyǵys eldi mekenin gazdandyrý barysymen tanystym. Mysaly, 8-shi iske qosý kesheni boiynsha qurylys-montajdaý jumysy 95%-ǵa aiaqtaldy. Nátijesinde 90 km gaz taratý jelisi salyndy. Bul aýmaqqa Promyshlennyi, Ońtústik-Shyǵys (sol jaǵy), Ońtústik-Shyǵys eldi mekeniniń oń jaǵynyń bir bóligi kiredi. Qazirgi ýaqytta gaz qubyryn synaý jumystary júrgizilýde.
Sonymen qatar, 9-shy iske qosý kesheniniń qurylysy boiynsha jumystar júrgizilýde. Bul – Ońtústik-Shyǵystyń negizgi aýmaǵy (oń jaǵy). Onda 90 km gaz taratý jelisiniń 65 shaqyrymy salyndy. Osylaisha aldaǵy jylytý maýsymynda Ońtústik-Shyǵys turǵyndary gazǵa qosyla alady. Bul shamamen 4 myń úi.
150-ge jýyq úi ornalasqan «Qazaqaýyl» (Qaraótkel) shaǵyn aýdanyn gazdandyrýǵa qatysty jobalaý-smetalyq qujattama ázirlenip jatyr.
Ótken aida Kóktal-1 gazben qamtamasyz etildi. Bul eldi mekenniń ózinde taǵy 2600 úi gazǵa qol jetkizdi. Endi turǵyndar jelini úiiniń ishine ótkizýi kerek.
Sonymen qatar, Agroqalashyq (2020 jyly gazǵa qosylmaǵan bóligi), Promyshlennyi eldi mekenderinde gaz taratý jelilerin salýdy jalǵastyramyz. Sondai-aq, «QazTransGaz Aimaq» AQ Kúigenjar, Michýrino, Internatsionalnyi eldi mekenderinde gazben jabdyqtaý jelileriniń qurylysyn júrgizýde. Atalǵan eldi mekenderdiń turǵyndary jańa jylytý maýsymynda gazǵa qosyla alady.
Ótken jylytý maýsymynda Temirjolshylar, Kóktal-2, Agroqalashyqtyń (bir bóligi) turǵyndary gazǵa qosyldy. 345 km kvartalishilik jeli salyndy.
Biyl barlyǵy 317 km gaz taratý jelisin salamyz, onyń 220 shaqyrymnan astamy salyndy.
Gazdandyrý – Elbasynyń aýqymdy jobasy. Bul joba ekologiiany aitarlyqtai jaqsartýǵa múmkindik beredi. Sebebi jer úiler kómir jaqpaidy, qala turǵyndarynyń ómir súrý jaǵdaiy jaqsarady, qaýipsizdik artady jáne t.b.
Gazdandyrý protsesi Memleket basshysynyń baqylaýynda», — dep jazdy elorda ákimi.
