Biyl el aýmaǵyndaǵy 49 shaqyrymdy quraityn sý bógeni qaita salynyp, jóndeldi. Bul týraly QR Tótenshe jaǵdailar ministri Iýrii Ilin málim etti, dep habarlaidy QazAqparat.
«Sý tasqyny qaýpiniń aldyn alý boiynsha óńir ákimdikteri jáne memlekettik quzyrly organdarmen birlesip jol kartasyn iske asyryp jatyrmyz. Bul óz kezeginde sý basý qaýpi bar eldi mekender sanyn 998-den 370-nen azaitýǵa múmkindik berdi. Sondai-aq, sý tasqyny qaýpiniń aldyn alý maqsatynda biyl 49 shaqyrymdyq bógen salyndy jáne jóndeldi. Jáne 47 shaqyrymdy quraityn ózen arnalaryna beket qoiyldy. Osy atalǵan sharalar materialdyq shyǵyndy edáýir qysqartýǵa, infraqurylym men turǵyn úidi sý tasqynynan saqtaýǵa múmkindik beredi. Biyl kóktemde elimizdiń 5 eldi mekeninde 49 turǵyn úidi sý basty. Jáne 4 avtojol ýchaskesin sý shaiyp ketti», - dedi Iu. Ilin ortalyq kommýnikatsiialar qyzmetinde ótken baspasóz máslihatynda.
Onyń aitýynsha, búginde aldaǵy kóktemde bolýy múmkin sý tasqynynyń aldyn alý boiynsha daiyndyq júrip jatyr.
«Elimizdiń taýly aimaqtaryndaǵy muzdyń qarqyndy erýi tótenshe jaǵdai nemese seldiń bolý qaýip tóndiredi. Osy oraida «Qazseldenqorǵaý» qaýipti ýchaskelerdi selden qorǵaýdyń jańa tehnologiialaryn engize otyryp, arnaiy baqylaý júrgizip jatyr. Negizinen sel júrý qaýpi Almaty, Jambyl, Shyǵys Qazaqstan, Túrkistan oblystary aýmaǵyna qatysty. Sonymen qatar sel qaýpin aldyn alý maqsatynda jerústi jáne jerasty tekserýler júrgiziledi. Qorǵas, Kishi jáne Úlken Almaty, Aqsai, Qarǵaly ózenderiniń basseinderinde avtomatty monitoring júiesiniń 31 stantsiiasy jumys isteidi. Olar jaǵdaidy baǵalaýǵa jáne sel oshaqtaryna jedel den qoiýǵa múmkindik beredi», - deidi ol.
