Foto: Pexels.com
Biyl 22 myńnan astam jol apaty tirkeldi, onda 2 myń adam qaza taýyp, 25 myńnan astam adam jaraqat aldy. Bul týraly QR IIM Ákimshilik politsiia komitetiniń tóraǵasy Qaisar Sultanbaev OKQ alańynda málimdedi, dep habarlaidy Ult.kz.
Qaisar Sultanbaevtyń aitýynsha, jol apaty men jaraqat alǵandar kórsetkishteriniń ósýi jol kólik oqiǵalaryn esepke alý tásiliniń ózgerýimen bailanysty. Qazir densaýlyqqa keltirilgen ziianǵa qaramastan, jol apatynan keiin meditsinalyq mekemege júgingen barlyq adamdar esepke alynady.
"Júrgizýshi tártibine de baqylaý kúsheitildi. 21 myńǵa jýyq mas júrgizýshi ustaldy, 10 myńǵa jýyq qarsy jolaqqa shyǵý derekteriniń joly kesildi. 25 myńnan astam júrgizýshi basqarý quqyǵynan aiyryldy. 20 myńnan astam quqyq buzýshy ákimshilik qamaýǵa alyndy. 400 myńǵa jýyq jaiaý júrginshige aiyppul salyndy", – dedi spiker.
Sultanbaevtyń esebi boiynsha biyl 10 mln astam jol erejesin buzýshylyq anyqtalǵan, bul byltyrǵy jylǵa qaraǵanda 3 mln-ǵa artyq. Ol úshin avtomatty túrde tirkeý kameralary belsendi qoldanylady. Olardyń kómegimen 7 mln astam jol erejesin buzǵandar anyqtaldy.
Sondai-aq avtokólik joldaryn kútip ustaýǵa jáne jol júrisin uiymdastyrýǵa qatysty jumys kúsheitildi. 38 myńnan astam tekserý júrgizildi, joldardy kútip ustaýda 36 myńnan astam kemshilik anyqtaldy.5,5 myńǵa jýyq laýazymdy tulǵa ákimshilik jaýapkershilikke tartyldy. Búgingi tańda joldardy kútip ustaý qaǵidalaryn buzǵany úshin eń tómengi aiyppul – 55 380 teńge.
«Joldaǵy adam shyǵyny apattyń negizgi úsh túrine bailanysty, olar: avtokólikterdiń betpe-bet soqtyǵysýy; jaiaý júrginshilerdi qaǵyp ketý jáne aýdarylý. Osy sebepter boiynsha bolǵan adam shyǵyny jalpy jol apatynda qaza tapqandardyń 73% quraidy. Apattyń osy úsh túriniń negizgi sebebi – jyldamdyqty arttyrý. Jyldamdyq rejimin baqylaýdaǵy tiimdi sheshim avtomatty kameralardy qoldaný bolyp tabylady. Olardyń sany búginde shamamen 25 myńǵa jýyq. Onyń ishinde, elordada – 6 myńnan astam, Almatyda – 9 myńnan astam jáne Shymkentte – 2 myńǵa jýyq birlikti quraidy», – dedi vedomstvo ókili.
