Foto: Orda.kz
Saltanat Nýkenovany óltirgeni úshin sottalǵan Qýandyq Bishimbaevtyń ata-ana quqyqtarynan aiyrylý máselesi apelliatsiialyq tártipte qaraldy, aldyńǵy sheshim kúshinde qaldy, dep habarlaidy Ult.kz.
Isti qaita qaraý barysynda sottalýshynyń burynǵy jubaiy Nazym Qaharman da sóz sóiledi.
«Bizdiń ótinishimiz bar. Máseleniń mán-jaiyna kelsek, birinshi satydaǵy sot sheshimi buzýshylyqtarmen shyǵaryldy. Qurmetti sot, Bishimbaev isi men Saltanat Nýkenovanyń qazasyna búkil Qazaqstan ǵana emes, búkil álem kýá boldy.
Biz bul máseleniń moraldyq jaǵyna taǵy da nazar aýdartqymyz keledi: osyndai adamgershilikke jatpaityn jáne óreskel qylmys jasaǵan adam ózin áke dep sanap, balalarǵa yqpal etip, ata-ana bola ala ma? Bizdiń oiymyzsha, jaýaby anyq! Mundai adam eshqandai jaǵdaida áke mártebesine ie bola almaidy.
Sot sheshiminde balalardyń pikiri men ustanymy kórsetilmegen. Sot marqum Saltanat Nýkenova balalarǵa jaqyn adam bolǵanyn elemei otyr. Balalar súiispenshilikti pasporttaǵy mórge bailanysty sezinbeidi. Sot formaldy ári qoǵamǵa ziian sheshim qabyldady.
Eger Saltanattyń neke kýáligi bolsa, Bishimbaev ata-ana quqyqtarynan aiyrylatyn edi. Biraq ol joq bolǵandyqtan, "eshteńe bolǵan joq" degendei qaraldy», — dedi Nazym Qaharman.
Ol sottyń balalardyń pikirin elemegenin jáne olardyń Bishimbaevty áke retinde qabyldaǵysy kelmeitinin taǵy da atap ótti.
