Elimizdiń birqatar óńirinde koronavirýs infektsiiasy órshi tústi. Bul týraly QR Densaýlyq saqtaý ministri Eljan Birtanov aitty, dep habarlaidy "Ult aqparat".
«Sońǵy 2 aptanyń jaǵdaiyn qarasaq, shynymen de ósim deńgeii baiqalýda. Ótken 2 aptanyń ishinde kúndelikti ósim deńgeii 5 paiyzdan aspady. Soǵan qaramastan, keibir óńirlerde koronavirýspen tirkelgen naýqastardyń sany artty. Mysaly, Atyraý, Qaraǵandy, Almaty, Jambyl, Qostanai, Túrkistan, Batys Qazaqstan oblystary men Shymkent qalasynda baiqaldy. Osy óńirlerde koronavirýsty juqtyrýdyń ósimi birinshiden, ókinishke orai, úlken kásporyndarda tirkelip otyr», - dedi ministr Ortalyq kommýnikatsiialar qyzmetindegi brifing barysynda.
Mysaly, onyń dereginshe, Atyraý oblysynda Teńiz kenishinde - 1 063 naýqas, Qaraǵandy oblysynda - 358 naýqas, al Shymkent qalasyndaǵy «PetroQazaqstan» uiymynda - 219, Nur-Sultan men Túrkistan qalasyndaǵy qurylys kásiporyndarynda 80-nen astam naýqas tirkelgen.
«Sonymen qatar Almaty men Jambyl oblystaryndaǵy áskeri uiymdardyń ishinde de kóp naýqas tirkeldi. Sebebi de belgili. Karantin kezinde biz, jalpy halyq úide otyrǵan kezde keibir jumysshylar, mysaly meditsina qyzmetkerleri, áskeri adamdar jáne jumysy toqtatylmaityn kásiporyndardyń mamandary jumys istedi. Infektsiianyń taralýy táýekeli joǵary boldy jáne osyndai jaǵdai tirkelip otyr», - dedi Eljan Birtanov.
