Qaza bolǵan Erasyl Áýbákirovtiń anasy aldyn ala sot otyrysyna kire almady, - dep habarlaidy kaz.tengrinews.kz tilshisi. Búgin Astana qalalyq qylmystyq ister jónindegi mamandandyrylǵan aýdanaralyq sotynda 23 jastaǵy stýdent Erasyl Áýbákirovtiń ólimi boiynsha aldyn ala sot otyrysy ótti.
Sot tyńdaýy jabyq tártipte ótti. Áýbákirovtiń anasy Astanaǵa arnaiy kelse de, sot otyrysyna kire almady. BAQ ókilderi de sot otyrysyna qatysa almady.
"Olar ózderi bárin sheshe saldy (jabyq tártiptegi sot otyrysy jaily - Avt.). Meniń balam kináli emes. (...) Endi men eshkimge senbeimin", - dep málimdedi qaza bolǵan stýdenttiń anasy Kenjegúl Áýbákirova.
"Men balamdy bes saýsaǵymdai bilemin, ol kináli emes. Keibir adamdar aityp jatqandai bala emes. Óte ókinishti, óte aýyr, óte qiyn. Balamnyń árdaiym patriot bolǵanyna árqashan maqtanamyn, naǵyz jigit boldy. Tipti bireý sútten aq, sýdan taza bolyp shyqsa, onyń jazasyn qudai beredi. Men endi qudaiǵa ǵana senemin, basqa eshkimge senbeimin", - dep málimdedi Erasyldyń anasy.
Aita keteiik, búgin Erasyl Áýbákirovtiń ólimi boiynsha kúdiktilerdiń biriniń advokaty isti alqa bilerdiń qatysýymen ótkizýdi suraǵan bolatyn. Onyń aitýynsha, muny kúdikti men onyń ata-anasy talap etip otyr.
Sot otyrysy sýdia Ashat Áshirbekovtyń tóraǵalyǵymen ótti, iske eki protsessýaldyq prokýror qatysty - Arsen Begalin men Natalia Júnisova.
Eske salaiyq, biyl 10 aqpanda Astanada meditsinalyq ýniversitettiń joǵalyp ketken stýdenti Erasyl Áýbákirovtiń denesi tabylǵan edi. Máiitte zorlyq belgileri boldy. Adam óltirdi degen kúdikpen tórt adam ustaldy - Aian Meiirbaev, Andrei Tihonenko, Vitalii Sherstenev jáne Nurbek Ájimbai.
