Kollaj: Ult.kz
Jýyrda belgili jýrnalist Nurseiit Jylqyshybai áleýmettik jelide erekshe aktsiia jariialaǵan bolatyn. Aktsiianyń jalǵyz sharty – jańa týǵan sábige Qunanbai esimin qoiý. Ol alǵashqy 10 balaǵa 300 myń teńgeden (jalpy qory 3 mln teńgeni quraidy) syiaqy taǵaiyndady. Osy oraida Ult.kz tilshisi bastamashy azamatty az-kem áńgimege tartty.
Maqsatym – «haip» emes, Qunanbai esimin jańǵyrtý
Jýrnalist óziniń maqsatyn aqsha taratyp «haip» jasaý emes, Abaidy – Abai qylǵan Qunanbaidyń esimin qaita jańǵyrtý ekenin aitty. Óitkeni qazir qazaq balasynyń atyn ósip-ónsin dep Óskenbai, myqty bolsyn dep Myqtybek qoimaityn bolǵan.
«Qazir ózimniń zamandastarym kishkentailary dúniege kelgen kezde esimin maǵynasy joq, qazaqqa on qainasa sorpasy qosylmaityn bir esimderdi qoiady. Ol úide qýanysh, toi bolyp jatqanda qyrqynan jańa shyqqan balaǵa «esimin nege bulai qoidyń?» dep áke-sheshesine aita almaisyń ǵoi. Ishtei qynjylasyń, áttegen-ai deisiń. Ózge memlekettiń taýlarynyń atyn qoiyp jatady, sol jaqtaǵy jetistikke jetken zamannyń zamananydaǵy adamdardyń atyn qoiady. Ol adam boldy ma, bolǵan joq pa, bir Qudai biledi.
Sodan keiin qazaqtyń sońǵy bolystarynyń biri, palýan bolǵan, qanshama qazaqty kezinde jarylqaǵan esiminen at ta, adam da úrkigen Qunanbai atamyzdyń esimi bizde jii qoiylmaidy eken. Ony ózim de baiqap júrmin. Sodan keiin náresteniń esimin Qunanbai dep qoisa dedim. Qunanbai dep qoiyńyzdar dep sózben aita salý ońai ǵoi. Ár Qunanbai degen balaǵa 300 myń teńgeden bersem dep sheshim qabyldadym. Iaǵni onyń da óziniń shekteýi bar. Ázirge 10 Qunanbaidyń esimin aittym, naýryz aiynan bastap. Qazir bir aidyń ishinde naýryz aiynda 4 Qunanbai dúniege keldi. Onyń bireýi – Túrkistan oblysynan, ekinshisi – Qaraǵandy oblysynan. Bul eki sábidiń 300 myń teńge syiaqylaryn jiberip qoidym. Endi keshe ǵana 2 Qunanbai dúniege kelipti, bireýi – Petropavldan, ekinshisi – Jambyl oblysynan. Bul balalardyń syiaqysyn endi jiberemin. Bul qandai stimýl, qandai keremet!», – dedi Nurseiit Jylqyshybai.
Esimdi satyp alý emes, jas otbasylardy qoldaý
Jýrnalistiń aitýynsha áleýmettik jelide jazylyp jatqan pikirlerdiń sany joq. Tipti aiaǵy aýyr kelinshekter, "balamnyń atyn Qunanbai dep qoisam úlgeremin be?" dep qyzyǵýshylyǵyn tanytyp jatqan kórinedi.
«Qudai amandyǵyn berse, bul shara ázirge 10 adamǵa arnalǵan, 10 adamǵa 300 myń teńgeden 3 mln teńgesin berip tastasam, ary qarai da jalǵastyrý oiymda bar. Óskenbai dep qoisyn, Besbai dep qoisyn, ádemi qazaqy esimder ǵoi. Odan eshkim jaman bolmaidy.
Toqsan aýyz sózdiń tobyqtai túiini, maqsatym, burynǵy qazaqy esimderdi jańǵyrtý, sonyń izin jalǵastyrýǵa altyn kópir bolý. Zamanbek, Altynbek degen de keremet esim ǵoi, aldaǵy ýaqytta osy esimderdi egiz balalarǵa qoisa, olarǵa da 300 myń tegeden 600 myń teńge syiaqy berýge bolady. Bálkim, aldaǵy ýaqytta Kenesary, Sydyq dep qoiǵandardy da qoldaityn shyǵarmyn. Bul istiń artynda da maqsat, múdde jatyr ǵoi. Qazaqtyń sońǵy handaryn biz qoldamasaq kim qoldaidy?! Keibireýiler aqshamen esimderdi satyp alyp otyr dep oilaýy múmkin, keibir adamdarǵa eshteńe jaqpaidy. Qaita ásirese jas otbasylardy qoldaý kerek», – dedi Nurseiit Jylqyshybai.
Onyń sózinshe balaǵa jaqsy esim qoiylsa, ári syiaqy alsa jaqsy. Sonymen qatar, ol bul balalar da úlken azamat bolyp, el tizginin ustaitynyna senim bildirdi.
«Kez kelgen nárse nietke bailanysty, niettenip qoiyp jatyr. Rasynda, ózimizdiń dińgegimizdi ózimiz eshqashan umytpaýymyz kerek. Jan-jaqqa eliktemeýiz kerek. Biz – qazaqpyz. Eshqashan ózińniń ultyńdy ózgerte almaisyń. Qazaq bolǵannan keiin elińe, jerińe qyzmet etýiń kerek qoi», – dedi Nurseiit Jylqyshybai.
Aqbota Musabekqyzy
Oqi otyryńyz: Antroponimika ǵylymy: Elimizdegi «birtúrli» esimder
