Bilim berý uiymdaryn attestattaý barysynda olardyń qaýipsizdigi basty talaptardyń biri bolady. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat tilshisi.
«Balalardyń qaýipsizdigi - eń basty másele. Ata-analar balalaryn balabaqshaǵa, ne mektepke jibergende alańdamaýy kerek. Olarǵa qatysty qaýipsizdik is-sharalary tolyǵymen qabyldanyp, jaily orta qalyptastyrýymyz qajet. Ol úshin tiisti jumysty uiymdastyrý kerek. Qazan qalasynda bolǵan jantúrshigerlik oqiǵa bárimizdiń qabyrǵamyzdy qaiystyrdy. Bul biz úshin úlken sabaq bolýy tiis. Sondyqtan biz bilim salasynda tiisti, keshendi, júieli is-sharalar qabyldaýymyz kerek», - dedi ol vedomstvonyń apparat jinalysynda.
Onyń atap ótýinshe, mektepterde dabyl túimeleri, beinebaqylaý júieleri, metall izdeýge arnalǵan qurylǵylar ornatylyp, arnaýly kúzet qyzmeti bolýy qajet.
«Qazan qalasynda oryn alǵa oqiǵa bizge taǵy bir óte mańyzdy jaitty kórsetti. Bul muǵalimderdiń, balalardyń, jalpy mektep qyzmetkerleriniń osyndai ártúrli jaǵdaida ózin ustaý máselesine qatysty. Ne isteý kerek? Qandai eń alǵashqy is-sharalar jasaý kerek? Mysaly, halyqaralyq akkreditatsiia júiesin qarasaq, eń birinshi qaýipsizdik máselesi qaralady. «Jaman aitpai jaqsy joq» demekshi, osyndai ártúrli jaǵdailarǵa tótep beretindei daiyn bolýymyz kerek. Endi akkreditteý talaptaryna osy máseleler qosylady. Balabaqshalardyń, mektepterdiń, kolledjderdiń attestatsiiasy kezinde qarastyrylatyn eń basty máselelerdiń biri qaýipsizdigi bolady. Sony reglamentke kóshirip, engizip jatyrmyz», - dedi Ashat Aimaǵambetov.
