Mańǵystaýlyq 4-synyp oqýshysynyń áreketine qatysty Bilim jáne ǵylym ministrligi málimdeme jasady. Mektepke deiingi jáne orta bilim berý komitetiniń tóraiymy Gúlmira Kárimova balaǵa aqshany qaitarýdy usyndy, - dep habarlaidy Tengrinews.kz.
Mektepke deiingi jáne orta bilim komitetiniń tóraiymy Gúlmira Kárimova bul jaǵdaiǵa qatysty pikirin Facebook-paraqshasynda jariialady.
"Mańǵystaýlyq tórtinshi synyp oqýshysy matematika sabaǵynda qoldanýǵa arnalǵan qural jasap, óziniń bilimi men kúsh-jigeriniń arqasynda respýblikalyq konkýrsta 1 million teńge utyp alǵany qýantady. Daryndy balalardyń áleýetin kótermeleý, olardy qoldaý óte mańyzdy. Oqýshy jeńip alǵan syiaqysyn óziniń mektebine interaktiv taqtany satyp alýǵa jumsaýǵa niet bildirgeni onyń meiirimdi júregi men basqa da jaǵymdy qasietterin kórsetedi. Bul rette interaktiv taqtany respýblikalyq konkýrsta jeńiske jetken oqýshy emes, jergilikti atqarýshy organ satyp alýy tiis. Árine, balalardyń óz mektebin qoldaýǵa jáne damytýǵa degen umtylysyn qoldaý kerek. Degenmen bul ondai jaǵdai emes", - dep jazdy ol.
Kárimova mektepterdi zańnamalyq turǵydan qarjylandyrý ákimdikterdiń quzyrynda ekenin de atap ótti. Onyń aitýynsha, jergilikti atqarýshy organdar qajetti qural-jabdyqtardy satyp alýǵa biýdjetten qarjy bólip otyr.
"Zań boiynsha mektepterdi qarjylandyrý ákimdikterdiń quzyretinde ekenin atap ótý qajet. Jergilikti atqarýshy organdar qajetti jabdyqtardy satyp alý úshin biýdjet qarajatyn bóledi. Mańǵystaý oblysy ákimdiginiń Bilim basqarmasyna ziiatkerlik konkýrsta jeńgen aqshany oqýshyǵa qaitarý jáne jergilikti biýdjetten bólinetin qarajat esebinen qajetti qural-jabdyq satyp alý usynyldy", - dedi ol.
Aita keteiik, oqýshy respýblikalyq áleýmettik jobalar baiqaýynda aqshalai júlde alǵan. Bul qarajatqa mektepke zamanaýi qural-jabdyqtar – interaktiv taqta satyp alynǵan.
