173 muǵalim 2021 jyldyń «Úzdik pedagogi» ataǵyna úmitker. Búgingi tańda respýblikalyq komissiia úzdikterdi tańdaý boiynsha jumys júrgizip jatyr. Kásibi mereke qarsańynda elimizdiń elýden astam muǵalimi «Úzdik pedagog» ataǵyna ie bolady, dep habarlaidy "Ult aqparat" QR bilim jáne ǵylym ministrliginiń baspasóz qyzmetine silteme jasap.
Aýqymdy baiqaýǵa qatysýshylar arasynda 132 mektepke deiingi jáne orta bilim berý, 41 tehnikalyq jáne kásiptik bilim berý uiymynyń pedagogteri bar. Olardyń barlyǵy aýdandyq, qalalyq jáne oblystyq kezeńniń qorytyndysy boiynsha usynyldy.
«Ótken jyldan bastap konkýrsqa qatysý úshin ótinimder, materialdar elektrondyq formatta qabyldanady. «Úzdik pedagog» ataǵyna bilim berý uiymdarynda jumys isteitin jáne keminde bes jyl úzdiksiz pedagogikalyq ótili bar muǵalimder úmitker bola alady. Konkýrs sheńberinde pedagogtiń bilim berýdi damytýǵa qosqan úlesi, pedagog qyzmetiniń nátijeliligi jáne onyń kásibi sheberligi eskeriletin bolady», - dep atap ótti QR Bilim jáne ǵylym ministrligi Mektepke deiingi jáne orta bilim komitetiniń tóraiymy Gúlmira Kárimova.
Respýblikalyq konkýrstyq komissiianyń qazylar alqasynyń quramyna qoǵamdyq birlestikterdiń, úkimettik emes uiymdardyń, ata-analar qaýymdastyǵynyń, «Atameken» UKP ókilderi, jýrnalister, belsendi pedagogter, Qazaqstandyq salalyq bilim jáne ǵylym qyzmetkerleri kásipodaǵynyń ókilderi jáne taǵy basqalar kirdi.
Aita keteiik, «Úzdik pedagog» respýblikalyq baiqaýy 2012 jyldan beri ótkizilip keledi. Osy ýaqyt ishinde konkýrs aiasynda 500-ge jýyq mektepke deiingi jáne orta, tehnikalyq jáne kásiptik bilim berý uiymynyń pedagogi marapattaldy.
«Úzdik pedagog» ataǵynyń iegerleri tósbelgi men 3 mln teńge (1000 AEK) kóleminde aqshalai syiaqy alady.
Respýblikalyq marapattan basqa, «Pedagog mártebesi týraly» Zań sheńberinde ákimdikter birjolǵy aqshalai tólemderi bar jergilikti nagradalardy taǵaiyndady.
Mysaly, Pavlodar oblysynda oblystyq baiqaýdyń jeńimpazdary 300 AEK mólsherindegi syiaqyǵa ie boldy. Shyǵys Qazaqstan oblysynda jergilikti biýdjet qarajatynan 800 myń teńgeden astam syiaqy tabys etildi. Basqa da óńirlerde úzdik muǵalimder 300 AEK kóleminde birjolǵy aqshalai syiaqy aldy.
