Beinejazba shyndyqty ashty: Aqtaýdaǵy túzetý ortalyǵy tekseriske tústi

Foto: nazcom.kz

Aqtaýda erekshe balalarǵa arnalǵan túzetý ortalyqtarynyń birinde jumys isteitin jattyqtyrýshy balaǵa kúsh kórsetti degen kúdikke ilindi, - dep habarlaidy Ult.kz "Jetinshi arnaǵa" silteme jasap.

Telearna málimetinshe, qala turǵyny ulynyń denesinde jii kógergen izder paida bola bastaǵanyn baiqaǵan. Ne bolǵanyn anyqtaý úshin ol túzetý ortalyǵyndaǵy beinebaqylaý kameralarynyń jazbasyn kórsetýdi suraǵan.

Beinejazbalar jaǵdaidyń mán-jaiyn ashyp bergen. Kadrlarda jattyqtyrýshynyń balaǵa dóreki qarym-qatynas jasaǵany kórinedi. Aldyn ala málimet boiynsha, bul jattyǵý kezinde bolǵan.

Oqiǵaǵa alańdaǵan ana quqyq qorǵaý organdaryna júgingen. Mańǵystaý oblysy Politsiia departamentiniń baspasóz qyzmeti ókili bul derek boiynsha qylmystyq is qozǵalǵanyn málimdedi.

"Qazir oqiǵanyń barlyq mán-jaiyn jan-jaqty, tolyq anyqtaýǵa baǵyttalǵan tergeý júrgizilip jatyr. Ótinish berýshiniń barlyq dáleli tekseriledi, sondai-aq, beinebaqylaý kameralaryndaǵy jazbalar muqiiat zertteledi. Mekeme qyzmetkerlerinen jaýap alynady", - deidi Mańǵystaý oblysy PD baspasóz hatshysy Aigerim Ibatýllaeva.

Budan bólek, tiisti sharalar qabyldaý úshin bilim berý jáne densaýlyq saqtaý basqarmalaryna usynys joldanatyny aitylǵan.

Al balanyń anasynyń aitýynsha, qazirgi ýaqytta ortalyq ýaqytsha jabylyp, onda tekserý júrgizilip jatyr.