Foto: QR Qorǵanys ministrligi
Mańǵystaý oblysyndaǵy poligonda sarbaz ólimge ákeletin jaraqat aldy. Ol aýrýhanaǵa barar jolda kóz jumǵan.
Qaiǵyly oqiǵa 7 qyrkúiekte "Oimash" poligonynda "Batys" aimaqtyq qolbasshylyǵy bólimsheleriniń jiyndary kezinde bolǵan. Bul týraly cmn.kz jáne lada.kz habarlaidy.
Al Stan.kz osy oqiǵada qaza bolǵan sarbazdyń ákesi jasaǵan videoúndeýdi jariialaǵan.
Marqumnyń ákesiniń sózinshe, qaiǵyly jaǵdai leitinant qarýmen oinap otyrǵanda bolǵan. Sol kezde abaisyzda tapansha atylyp ketip, oq sarbazdyń betine tigen."Aqtaýǵa bara jatyrmyn. Ulymdy betinen atyp óltirdi. Bul abaisyzda bolǵan jaǵdai emes. Qarý atylyp ketý úshin saqtandyrǵyshtan alý kerek. Bul abaisyzda bolmaidy. Qazir ol qamaýda deidi", – dedi er adam.
BAQ málimetinshe, shamamen 17:10-da lagerdiń kezekshisi, PM 9 mm tapanshasynan ruqsat etilmegen oq atyp, gvardiia qatardaǵy jaýyngeri Marat Erboluly Barqulovtyń betine tigizgen.
Jigit oq jaraqatymen shuǵyl túrde qalalyq aýrýhanaǵa jetkizildi, alaida jolda, shamamen 17:40-ta, qaitys boldy. Aqtaý garnizonynyń baspasóz qyzmetiniń málimetinshe, ólim qarýdy durys paidalanbaý saldarynan bolǵan.
"Is Qorǵanys ministriniń erekshe baqylaýyna alyndy. Onyń tapsyrmasy boiynsha Qorǵanys ministriniń orynbasary general-maior Sh-H. Jazyqbaevtyń basshylyǵymen arnaiy komissiia quryldy. Qaiǵyly jaǵdaidyń mán-jailary jan-jaqty tekserilip, tergeý organdaryna obektivti tergeý júrgizý úshin tolyq kómek kórsetilý ústinde.
Kináli tulǵalar QR Qylmystyq kodeksine sáikes qatań jaýapkershilikke tartylady", - delingen QR Qorǵanys ministrliginiń habarynda.
Oqiǵanyń sebepteri men mán-jaiy anyqtalyp jatyr, qylmystyq is qozǵaldy. QR Qarýly Kúshteriniń Qurlyq áskerleriniń qolbasshylyǵy men jeke quramy qaza bolǵannyń týystary men jaqyndaryna kóńil aitty.
