Belgiia úkimeti rojdestvolyq merekeler qarsańynda sanitarlyq qaýipsizdiktiń qosymsha sharalaryn engizýde. Otyrys bolǵan kúni eldiń premer-ministri Aleksandr De Kroo COVID-19 virýsyna qarsy vaktsinanyń úshinshi dozasyn alǵanyn jariialady, dep habarlaidy QazAqparat.
«Elimizde koronavirýstyń «delta» shtamymen kúres júrgizýge baǵyttalǵan sharalar kesheniniń iske qosylǵanyna úsh apta boldy, biz olardyń (sharalardyń) rasymen de kómektesip otyrǵanyn kórip otyrmyz: infektsiia juqtyrý jaǵdailary azaiýda», - dedi baspasóz konferentsiiasynda A.Kroo.
«Biraq, bul sandarǵa qaramastan, alańdaýǵa áli de sebep bar ekeni anyq: virýstyń omikron nusqasy jaily estip júrgenimiz jaqsy jańalyq emes», - dep qosty ol.
Sarapshylardyń baǵalaýynsha, virýstyń bul nusqasy kóp uzamai Belgiiada basym bolady.
«Biz burynǵydan qyraǵy bolýymyz kerek ekeni sózsiz», - dep eskertti belgiialyq premer.
A.Kroonyń aitýynsha, qazirgi jaǵdaida «býsterlik» ekpe saldyrtý óte mańyzdy.
«Óz basym, búgin ózime ekpe saldyrttym», - dep qosty A.Kroo.
2021 jyldyń 26 jeltoqsanynan bastap ǵimarat ishinde is-sharalardy ótkizýge tyiym salynady. Kinoteatr, teatr jáne kontsert zaldary óz jumysyn toqtatady. Kitaphanalar, murajailar jáne sporttyq sharalar burynǵydai jumys isteidi. Kádimgi basseinder ashyq bolady, biraq oiyn-saýyq basseinderi (akvapark) jabylýy tiis.
Kóshede palatkalar ishinde ótkiziletin is-sharalar, sonyń ishinde rojdestvolyq jármeńkeler men «qysqy kenttter», mádeni is-sharalar, jinalystar toqtatylady. Budan basqa, 100-den astam adamdy jinaityn sharalar úshin jeke kirý jáne shyǵý esikteri qarastyrylǵan birjaqty qozǵalys kestesi qurylýy tiis. Dúkennen bir ýaqytta zat satyp alýǵa 10 sharshy metrge bir adam kirgiziletin bolady. Kásibi jáne áýesqoi sporttyq oiyndar (fýtbol matchtary, velokross) toqtatylady.
Belgiiada qashyqtan jumys isteý erejeleri burynǵydai qalmaq: el azamattary jumysyn aptasyna tórt kún úiden atqarady.
«Bul – densaýlyq saqta júiesine salmaq túsirmeý, mektepterdiń qysqy demalystan keiin 10 qańtarda ashylýyn qamtamasyz etýge baǵyttalǵan sharalar», - dep atap ótti A.Kroo.
Premer-ministr bul sharalardyń belgiialyqtar úshin aýyr ekenin qosyp ótti.
«Barlyǵymyz bir jyl kúsh salǵannan keiin Rojdestvony basqasha ótkizetinimizge úmittendik. Alaida bir jyl buryn barlyq barlar men dúkender jabyldy, shashtarazdar jumysyn toqtatty. Bir-birimizdi kórmei kettik. Biyl da osylai bolýy múmkin. Ótinish, qaýipsizdik sharalaryn saqtańyzdar: qonaqtar sanyn shektep, densaýlyǵyńyzdy kútińizder», - dep úndedi A.Kroo.
