Belarýste áskeri poligonda áýeden desantshylardy túsirý kezinde eki reseilik soldat opat boldy. Bul jóninde Resei qorǵanys ministrligine súiengen RIA Novosti agenttigi habarlady, dep jazady Azattyq.
Vedomstvonyń aitýynsha, desantshylar Grodno qalasyndaǵy jer jaǵdaiy beimálim aýdanǵa túspek bolǵan. "Kenet qatty jel soǵyp", desantshylardyń parashiýti durys ashylmai qalǵan. Áskerilerdiń biri qosymsha parashiýtin paidalanyp, qutqarmaq bolǵan. Alaida ol da ashylyp úlgermegen. Qulaǵannan keiin eki soldat aýrýhanaǵa jatqyzylǵan, biraq dárigerler qutqara almaǵan. Qorǵanys ministrligi ekeýiniń jaldamaly qyzmetker bolǵanyn aitty.
Buǵan deiin "BYPOL" kúshtik qurylymnyń burynǵy qyzmetkerleriniń birlestigi Belarýste "Gojskii" poligonynda Resei áýe desant kúshteriniń eki qyzmetkeri: ofitser men jedel qyzmet soldaty áýeden túsken kezde opat bolǵanyn habarlaǵan.
12 qarashada Belarýs Qorǵanys ministrliginiń baspasóz qyzmeti "Gojskii" poligonynda Resei men Belarýs áýe áskeri kúshteriniń birikken jattyǵýy bolatynyn habarlaǵan. Habarlamada sharanyń maqsaty "Belarýs memlekettik shekarasynda áskeri qimyldyń artýyna bailanysty" odaqtas el kúshteriniń reaktsiia bildirý qýatyn tekserý dep jazylǵan. Nexta Live telegram arnasynyń habarlaýynsha, "Gojskii" poligony Litvadan – on shaqyrym, Polshadan 20 shaqyrym jerde jatyr.
Desanttar túsirilgennen keiin belorýs jáne orys sarbazdary qarsylas taraptyń platsdarmyn basyp alý jáne ustap turý, nysandardy, zańsyz qarýly toptar men diversiialyq-barlaý toptaryn izdep joiý siiaqty birqatar oqý-soǵys tapsyrmalaryn oryndaýy tiis bolǵan.
