Almatynyń bas memlekettik sanitariia dárigeri Jandarbek Bekshin onlain brifing barysynda jańa qaýlyny túsindirdi, dep habarlaidy QazAqparat.
«Tórtinshi tolqyn qaýpi tónip tur, oǵan delta shtamy sebep, ony úndi shtamy dep te ataidy. Biz «jasyl» aimaqqa ótkende aýrý kórsetkishi táýligine 100 jaǵdaiǵa deiin tómendedi, biraq jańa shtamdarǵa bailanysty kúrt ósti. Úndi shtamynyń basqa mýtatsiialanǵan shtamdarmen salystyrǵanda patogendiligi joǵary. Osyǵan bailanysty qatań shekteý sharalaryn engizýge májbúr boldyq», - dedi Bekshin.
Qoǵamdyq tamaqtaný nysandary qyzyl aimaq talaptary boiynsha jumys isteýi tiis, saǵat 7.00-den 20.00-ge deiin jumys isteýge ruqsat. Jumys kúnderi tolymdyǵy 50 paiyz, biraq 30 orynnan aspaýy tiis, al senbi men jeksenbi kúnderi tyiym salynady. Biraq jetkizý qyzmetine ruqsat etiledi. Al Ashyq qatysýshylary túngi saǵat 2-ge deiin jumys istei alady, olarda tolymdyq 50 paiyzǵa deiin, biraq 50 orynnan artyq emes.
Ashyq-qa qatyspaityn banket zaldary jumys istei almaidy. Al Ashyq músheleri túngi saǵat 2-ge deiin jumys isteidi, biraq adam sany 3-dan aspaýy tiis. Eske alýdan basqa ujymdyq is-sharalarǵa tyiym salynady.
Monshalar barlyq kúni jumys isteidi. Saýnalar, spa-ortalyqtar, basseinder tek jumys kúnderi isteidi. Al Ashyq músheleri óz rejimi boiynsha.
Kinoteatrlar men teatrlarǵa tyiym salynady. Tek Ashyq júiesimen tolymdyǵy 30 paiyzdan artyq bolmaǵan jaǵdaida jumys isteýge bolady.
Biliard, kompiýterlik klýbtar Ashyq-syz jumys istemeýi kerek.
Aita keteiik, Almatynyń bas sanitariia dárigeri Jandarbek Bekshin 26 maýsymda jańa qaýlyǵa qol qoiǵan bolatyn. Qaýlyǵa sáikes qalada jappai betperde taǵý rejimi engiziledi.
Qaýly 28 maýsymnan bastap kúshine endi.
