Búgin Tutynýshylardyń quqyqtaryn qorǵaý komitetiniń «Bek Air» AQ áýekompaniiasyna ekinshi aryzy boiynsha birinshi sot otyrysy ótti. Bul týraly "Ult aqparat" Saýda jáne integratsiia ministrligine silteme jasap habarlaidy.
Komitettiń aryzyndaǵy talaptary «Bek Air» AQ-na qatysty júzege asyrylǵan reisterge bilet satyp alǵan jolaýshylarǵa aqshalai qarajatty óteý týraly bolyp otyr. Úshinshi tulǵa retinde osy protseske bilet satqan «Aviata» agenttiginiń ókili de qatysty. Budan basqa, Tutynýshylar quqyǵyn qorǵaý komitetiniń ótinishi boiynsha sot otyrystaryna prokýror men «Qazaqstannyń aviatsiialyq ákimshiligi» AQ ókili qatysady.
Jalpy tutynýshylar komiteti 301 bilet satyp alǵan 151 azamattyń múddesine qyzmet etedi. Bul jerde talap-aryz somasy 10,5 mln teńgeni qurap otyr. Komitetke ótinishter áli de túsýine bailanysty bul soma ulǵaiýy da múmkin.
Aita keteiik, «Bek Air» AQ Almaty qalasy Túrksib aýdandyq sotynyń sheshimine apelliatsiialyq shaǵym bergen bolatyn. Onda sot azamattarǵa qarajatty óteý týraly Tutynýshylar quqyǵyn qorǵaý komitetiniń aryzyn qanaǵattandyrǵan bolatyn.
Eske sala keteiik, 2019 jyldyń 27 jeltoqsanynda Almaty-Nur-Sultan baǵytyndaǵy ushaq apatqa ushyrady. Bortynda 93 jolaýshy jáne 5 ekipaj múshesi boldy. Áýe kemesiniń komandiri 57 jastaǵy Marat Muratbaev oqiǵa ornynda ajal qushty.
Ushaq jerge qulaǵan soń syrǵanap baryp áýejai aýmaǵyna jaqyn ornalasqan eki qabatty úige soǵyldy. Saldarynan 12 adam qaza tapty. Osydan keiin Bek Air áýe kompaniiasyna tiesili toǵyz Fokker-100 ushaǵynyń qyzmeti toqtatyldy.
Arada bir ai ótkennen keiin apatqa ushyraǵan Bek Air ushaǵynyń ekinshi ushqyshy qaza boldy.
